Sunday, October 24, 2021

Yn saiñ dur ïa ka football ha WKH lyngba ka La Liga academy school

Nongstoiñ, Risaw 11: Ka Kynhun jong ka Pyndengrei sport Social and cultural Club myn ha ka sngi nyngkong jong ka taiew ka la plie paidbah ïa ka shlem ai jinghikai ha ka jingialehkai football na ka bynta ki khynnah ba naduh ka 6 snem kyrta haduh ka 18 snem lyngba ka jingkyrshan jong ka La Liga Academy School, India.
Ha katei ka sngi, u Bah B. Marbaniang uba long u Consultancy ka La Liga Academy, India u la ai ka jingpynshai halor katei ka academy bad u la iathuh ruh ïa ka thong ba kane ka jaka ai jinghikai ka ju leh na ka bynta kito ki khynnah donsap ha ka football.
Ïa kane ka jingïalang plié la ïoh ban pynlong hapoh ka Madan Nongpathar Stadium ha Pyndengrei ha ryngkat ka jingïadonlang ruh u Consultancy u bah B. Marbaniang Consultancy ka Laliga Football Academy India, u bah John Fisher Nongsiang President ka Pyndengrei Sport Club, ki Coach, ki dkhot ka Pyndengrei Sport Club bad kiwei kiwei.
Na ka liang jong u bah B. Marbaning haba ai jingkren ha katei ka jingialang u la ong ba ka Laliga Football School India kadei ka project jong ka Laliga Footbal School napoh Ri Spain bad ha India ka wan lyngba ka India on track kaba dei kawei na ki kynhun trei ha kaba iadei bad ka liang jong ka sport.
U la ong ruh ba ka jingwan iuh kjat ka Laliga ha Megahalay kadei lyngba ki sport club bad hapoh ka jylla ki dang don tang kumba 3 tylli ki centrte kata ka Littlestar Football Academy na Bynther, ka Sangshong Sport Club bad ka Pyndengrei Social & Cultural Sport Club.
Ym tang kata u la ong ruh ba lyngba kane ka shlem ai jinghikai ki khynnah kin ioh ia ki jingshah hikai football kiba katkum kane ka juk ialehkai kaba mynta bad ka jingthmu ka long ruh ban thaw lad thaw lynti ia ki khynnah donsap ba kin ioh ban mih sha bar ha kiba bun ki rynsan bad ia kiba kham tbit yn jied ruh ban leit shah pyntbit shaduh ka Ri Spain da ka scholarship.
Katba na ka liang jong u bah John Fisher Nongsiang u la kyntu ia ki khynnah kiba don sap ha ka jingialehkai phutbol ba ki dei ban long kiba kohnguh, kiba don akor bad kiba bud ryntih ia kaei kaba ki coach kyntu ruh ia kiba la kham heh ba kin kiar na ki jingmlien kiba sinew bad ban kiar ruh na ki jingdih pynbuaid lada ki kwah ban kiew shakhmat.