Yn kyrshan ka HSPDP ïa ka UDP ha Mawphlang

Shillong, Risaw 12: Ka Central Executive Committee (CEC) jong ka Hills State People’s Democratic Party (HSPDP) kaba la long hynne ka sngi ka la shim ïa ka rai ban ai ka jingkyrshan ïa u kyrtong ka United Democratic Party (UDP), u Bah Eugeneson Lyngdoh uban ïa khun ïa ka ilekshon shiteng samoi na Mawphlang.

Ïa kane la ïathuh da u president ka HSPDP, u Bah PK Pangniang haba ïa kren bad ki lad pathai khubor hadien ba la wai ka CEC.

“Hadien ba ngi la ïoh ïa ka jingkhot bad jingkyrpad bad hadien ka jingïakren bad u president ka UDP, u Bah Metbah Lyngdoh, kaba ngi la ïadon lypa ha ka RDA ngi la ïoh ban ïa pynbeit lang ha shuwa ban pynbna ïa u kyrtong ka UDP, ha kaba mynta ka sngi ngi la rai ban ai ka jingkyrshan ba pura ïa u Bah Eugeneson, uba dei ruh u khun jong u MLA barim u Bah SK Sunn uba la khlad noh,” ong u Bah Pangniang.

Shuh shuh u la ong ba na ka liang ka HSPDP ha shuwa ba kan mih ban leit ban ïalap ilekshon na ka bynta u Bah Eugeneson, ngin pyntip sha ka UDP ba ka dei ban don ka jingïakynduh kyrkieh jong ka RDA khnang ban ïoh ïa pyrkhat kumno ban tur shaphrang ne ban ïaleit lang na ka bynta ka jingïalap ilekshon na ka bynta u Bah Eugeneson.

Ha kaba ïadei pat bad ka jingkyrshan ïa u kyrtong ka UDP na Rajabala u Bah Pangniang u ong ” Kum ka party ngim don eiei ban ong bad kumjuh ruh na ka bynta ka Mawryngkneng namar ka UDP ne RDA kam shym la pynïeng kyrtong”.

Previous articleÏaroh u Bah Process ïa ka sorkar MDA ba rai pynkynriah ïa kiba sah ha Them Metor
Next articleMynjur ka komiti ban ai tika Covaxin ïa kiba naduh 2 haduh 18 snem