Yn ïakren ka HSPDP bad ka GLSMC ban ai Jylla la ka jong

Ki nongïalam ka HSPDP

Shillong, Risaw 12: Ka Hills State People’s Democratic Party (HSPDP) bad ka Garo Land State Movement Committee (GLSMC) ki la ïakut ban ïatrei lang na ka bynta ban ïa phiah noh ïa ka jylla, kata hapdeng ki Khasi Jaiñtia bad ki Garo kata ban ïoh noh la ka jong ka jong ka jylla.

U president ka HSPDP u Bah KP Panniang u la ïathuh ba ha u Nailur mynta u snem ka la don ka jingïakren hapdeng ki arliang mamla bad ki la rai ban thaw ïa ka Co-Ordination Committee na ka bynta ban pynïaid shaphrang na ka bynta ban ïoh noh la ka jong ka jong ka jylla ka GLSMC na ka bynta ka jylla ki Garo bad ka HSPDP na ka bynta ka Khasi Jaiñtia State.

“Ngi la shim ka rai ba kan sa don biang ka jingïakynduh biang bad ka GLSMC ha kaba ïadei bad ka jingdawa jylla la kajong kajong”,ong u Bah Pangniang.

Shuh shuh u la ong ba na ka liang ka HSPDP ka la pynkhreh ka jingthoh ban pynshai halor ka nongrim ba ka ïeng ban ïoh ka jylla ba kyrpang tang ïa ki Khasi Jaiñtia bad ïa kane yn sa pyllait paidbah lyngba ki lad pathai khubor halor ka nongrim ba ki ïeng.

“Ngi la shim ruh ka rai ban nang pynkhlaiñ ïa ka party bad na ka bynta kane ngin sa pynlong ïa ka General Council ha ka taïew ba nyngkong u Nohprah ban jied ïa ki nongkitkam ba thymmai kumba la bthah da ka election commission jong ka ri bad ban phah sha ka ïa ki kyrteng jong ki nongïalam,” ong u Bah Panniang.

Previous articleBun ki seng ki la khylliap lama, ka UDP ka kwah jingïatylli ki seng trai Ri: Bindo
Next articleÏaroh u Bah Process ïa ka sorkar MDA ba rai pynkynriah ïa kiba sah ha Them Metor