Yn ïakhih tyngeh ka Sur Ri Bhoi, ba kuman jingdawa ka Sur Nongmawlai

Thang tyngshop ka Sur Ri Bhoi ha Nongpoh

Nongpoh, Nailur 13: Shibnai hadien ka jingshah siat ïap jong u Bah Cheristerfield Thangkhiew, ka sur jingdawa ïa ka jingbishar kaba hok bad ban wengkam shipor ïa kito ki heh pulit kiba la donkti ban siat ïap ïa u Bah Thangkhiew ka la nang sawa jur hadien ba ka Sur ki Nong Ri Bhoi ki la pynlong ïa ka prokram thang tynshop kiba kynthup naduh u Myntri Rangbah ka jylla, u Myntri ka kam pohiing bad wat ïa ki lai ngut ki heh pulit kiba la donkti ban siat ïap ïa u nongïalam barim ka HNLC.

            Ïa kane ka prokram ban lum ban lang ïa ki paidbah nongshong shnong ka them Ri Bhoi lyngba ka Sur ki Nong Ri Bhoi ban pynrem ïa ka jingjia shah pynïap klep jong u Bah Cheristerfield Thangkhiew bad ban thang ïa ki tyngshop jong ki nongïalam sorkar ka jylla bad wat ki heh pulit la pynlong hakhmat ka MUDA Urban Shopping Complex ha Nongpoh.

            Ha kane ka prokram ba la pynlong da ka sur ki Nong Ri Bhoi, la wan ban ai jingkyrshan bad ban ai mynsiem lang da ki nongïalam ka Sur ki Nong Mawlai kumjuh u khun shynrang jong u Bah Cheristerfield Thangkhiew lem bad ki nongïalam jong ki kynhun bapher bapher kynthup naduh ki longkmie longkpa bad ki khun samla jong ka them Ri Bhoi District.

            Ha ka jingkren jong ki nongïalam ka Sur ki Nong Ri Bhoi kynthup ruh ki nongïalam ka Sur ki Nong Mawlai, ki la pynpaw ïa ka jingsngewkhia kaba jur halor ka jingkuman jong ka sorkar jylla kaba la lamkhmat da ka MDA ban ai ka jingbishar kaba hok halor ka jingshah siat ïap jong u Bah Cheristerfield Thangkhiew ha ka shiteng synñia jong ka 13 tarik u Nailar da kaba ai daw ba u la pyrshang ban ïakhun pyrshah ïa ki pulit da ka tari.

            Na ka liang ki nongïalam, ki la pynpaw ruh ïa ka jingbym sngew ïahap halor ka jingai ktien jong ka sorkar jylla, ban ap shwa ïa ka rai lane ka jingbishar katkum ka iingkashari lane ka Judicial Enquiry, ha kaba ki la pynban jur ïa ka jingdawa ba ka sorkar jylla ka dei ban tih bniah bha halor kane ka jingjia kaba sngewsih pyrshah ïa u Bah Thangkhiew ïa u ba la shu kynnoh donkti ha ki kam pynbthei ha kane ka jylla bad la shu siat ïap ïa u khlem ka jingbishar kaba bniah, ki la bynrap, ba ka sorkar jylla ka dei ban pynshitom mardor ban weng kam shipor ïa kito ki pulit kiba la donkti ban siat ïa u Bah Thangkhiew.

            Ha ka jingkren jong ki nongïalam bapher bapher, la sakhi ruh ïa ka jingangnud ban ieng ïatylli lang kawei hapdeng ki paid nongshong shnong jong ka jaidbynriew ka bri u hynñiewtrep ban ieng ïada ïa ka lawei jong ki khun samla da kaba kyntu ruh ba ki khun samla kin ieng triang ban minot thop ïa la ki jingpule ban kot sha ki kyrdan kiba heh kumjuh ba ka jylla kan ïoh ïa la ki heh ophisar IAS, IPS ki nongïasaid aiñ lane kiwei kiwei ki heh ophisar kiban ri ban da ïa la ka jylla bad ka jaidbynriew.

            Na ka liang ka Sur ki Nong Ri Bhoi, ha ka prokram thang tynshop, ki la rai ruh ban ai ka jingkyrshan kaba pura ïa ka jingdawa jong ka Sur ki Nong Mawlai ban pynïoh ïa ka jingbishar kaba hok halor ka jingjia ïa u Bah Thangkhiew bad ruh ki la long kiba kloi na ka bynta ki jingïakhih kiba jur lada ka sorkar ka dang kuman ïa ki jingdawa baroh.

Previous articleKlun u bar jylla 2 akar ka jaka ban buh karkhana jri ha Mawsmai
Next articleRai ka sorkar ban pyntreikam ïa ka MMAR 2021, pynkylla MOU ban pynbiang Internet