U Modi un rem ïa ka ilekshon lada u ïakhun na Gujarat: Rakesh Tikait

U Rakesh Tikait bad Narendra Modi

New Delhi, Nailur: U nongïalam ki nongrep u Rakesh Tikait ha ka sngi U Blei ka 5 tarik u Nailur u la ther tyngeh ïa u Myntri Rangbah Duh ka ri u Narendra Modi bad u la ong ba un rem ïa ka ilekshon lada u ïakhun na Gujarat.
“U Myntri Rangbah Duh ka ri un rem ïa ka ilekshon lada u ïakhun na Gujarat. Ki BJP ki la pynjot ïa ka Gujarat. Ki la pynkylla ïa ka sha ka jylla ki pulit,” ong u nongïalam ka Bhartiya Kisan Union (BKU) sha ki lad pathai khubor.
U Tikait ua la kren ïa kane hadien ba u la shim bynta ha ka ‘Kisan mahapanchayat’ ha Uttar Pradesh’s Muzaffarnagar ha kaba da ki hajar ngut ki nongrep ki la ïalum ban pyrshah ïa ki lai tylli ki aiñ nongrep jong ka sorkar pdeng. Ïa kane ka prokram la pynlong da ka Samyukt Kisan Morcha (SKM) ha madan jong ka Government Inter College ha Muzaffarnagar.
“Ka mahapanchayat jong ka 5 tarik u Nailur kan pynlong ïa ka sorkar u Yogi-Modi bakin sngewthuh ïa ka bor jong ka ki nongrep, ki nongbylla ha ki kam rep, kiba nongkyrshan ïa kane ka sienjam ba ki la shim. Ka Muzaffarnagar mahapanchayat kan long ka jingïakhih kaba heh tam na kine ki khyndai bnai ba la leit ba ki la ïakhih,” ong u nongïalam ka SKM ha ka jingkren jong u.
U Rakesh Tikait u ïathuh ruh ba ïa kine ki jingïalang yn pynlong ruh ha kylleng ka ri India.
“Ngi hap ban pynsangeh ïa ka ri na ka jingshah die. Ki nongrep ki dei ban lait im, ka ri ka dei ban lait im, ki nongkhaïi, ki nongtrei bad ki samla ki dei ban lait im- kane ka dei ka jingthmu jong ka rally,” u la ong.
Ki dur khmat ba paw kum ka Medha Patkar bad Yogendra Yadav la ïohi ba ki la don lang ha ka rynsan ha kane ka sngi.
Kumba shu kdew ki nongrep ki la pynlongïia ka jingïakhih naduh u bnai Naiwieng mynshem snem pyrshah ïa ki lai tylli ki aiñ nongrep ba la pynlong aiñ da ka sorkar pdemg: ka Farmers’ Produce Trade and Commerce (Promotion and Facilitation) Act, 2020; ka Farmers Empowerment and Protection) Agreement on Price Assurance and farm Services Act 2020 bad ka Essential Commodities (Amendment) Act, 2020.
La ithuh ïa kine ki aiñ ha u bnai Nailur, kaba ailad ïa ki nongrep ba kin die beit beit ïa ki mar rep jong ki, shabar ka ïew dielang ba la buh da ka sorkar, ban die sha ki nongthied kiba dei ki heh saipan. Ka sorkar ka ong ba kane kan ïarap ïa ki nongrep ba kin lah ban die ha ka dor ba khambha. Ki nongrep pat ki ong ba kine ki aiñ ba la thaw kan pynmong ïa ka jingim baman ka sngi ki nongrep bad kan pynlong ïa ki ba ki hap ban ïadait dor bad ki kompeni kiba heh bad kiba khmih haba pynïaid iew ïa ki mar rep.
Ki nongïalam jong ki nongrep bad ka sorkar pdeng ki la dep pynlong ruh katto katne ki jingïasyllok kabym shym la poi shano shano.

Previous articlePynmareh baiskil ka Assam Rifles na Shillong sha New Delhi
Next articleNaduh ba synshar ka MDA jyllei ki kam beaiñ ha ki tnad sorkar: Zenith