Sunday, October 24, 2021

U Lalengmawia ka Mizoram u rangïalehkai ISL ba remdor tam mynta ka samoi

Mumbai, Nailur 08: Na u snem sha u snem la ïohi ba ka lympung ïalehkai phutbol ka Indian Super League ka la nangkiew bad nangïaid ïew khamtam ha ka jingïadie ïathied ïa ki rangïalehkai la ki dei ki rangïalehkai trai ri ne bar-ri.
Mynta ka samoi ki don san ngut ki rangïalehkai kiba la thied remdor da ki club ISL.
U Lalengmawia na jylla Mizoram ba dang 20 snem ka rta u dei uba remdor tam na kine ki san ngut hadien ba shah thied ha ka dor T2.1 Klur ha ka lahduh ka ISL, ka Mumbai City FC (MCFC).
Une u rangïalehkai pdeng dangkhie ka ri, u la shah kthong ha kiba bun tylli ki club ISL namar u don shisha ïa ka sap ïalehkai kaba kyrpang bad uba skhem shisha ha madan. Utei u khlur ïalehkai ka Mizoram u sdang ïa ka phutbol da kaba leit pynbit ha AIFF Elite Academy shuwa ba un ïasoh bad ka Indian Arrows ha u snem 2017.
U dei shisha u rangïalehkai uba trei shitom kat haduh ba un ïoh mih madan ha ka I-League na ka Arrows.
Hadien kane u la shah khot ha ka NorthEast United FC bad ïoh mih madan ha ka ISL ha ka samoi 2018-19. Mar shu mih madan ha ka ISL une u samla u la pyni shisha ïa ka sap kyrpang watla u dangrit ka rta kat haduh ba bun ki club ki la shohbiej ïa u.
U Lalengmawia u la shah jied syndon ha ka samoi ba la dep ban long u captain ka NEUFC bad kylla long ruh u captain ba khynnah tam ha ka history ka ISL.
Kane ka jingtbit jong u ka la pynlong syndon ïa ka Mumbai City FC ban ïakhun haduh ban da ïoh ïa u da kaba siew syndon ïa ka transfer fee kaba T.80 lakh. Ka don ka jingkyrmen skhem ba u Lalengmawia un nangkiew ha ka jingïalehkai hapoh ka jingïalam u coach thymmai, u develops under Sergio Lobera.
U Hugo Boumous, 26 snem u dei uwei pat u rangïalehkai uba la thied remdor mynta ka samoi. Ïa une u rangïalehkai la thied hi da ka Mumbai City FC ha ka dor T.2 Klur.
Ka MCFC ka la thied duh ïa u hadien ba u la ïarap ba kan ïohrah ïa ka namlahduh ka ISL ha ka samoi ba la dep kaba dei ruh ha ka sien nyngkong bad ïohrung ruh sha ka AFC Champions League. U Boumous u thep arkol bad khyndai tylli ki assist ha ka samoi ba la dep. U la mih madan ïa ka FC Goa ha ka samoi 2018-19 hapoh ka jingïalam u Sergio Lobera kum u coach da kaba thep 11 kol bad 10 tylli ki assist.
U Liston Colaco, uwei pat u rangïalehkai ba remdor ka India uba shah thied haduh T.1.20 Klur ha ka ATK Mohun Bagan. Une u rangïalehkai u la kiew bha ka rukom ïalehkai naduh ba u donlang bad u Sergio Lobera ha ka FC Goa, hynrei hadien kane u la ïasoh pat bad Hyderabad FC. Na ka Hyderabad u la shah tan ha ka ATKMB bad kyrmen skhem ba un nangkiew ha ka jingïalehkai mynta ka samoi.
U Ishan Pandita uwei pat u rangïalehkai dangkhie ka India uba la shah thied ha ka dor T.60 Lakh ha ka Jamshedpur FC. La niew ïa u Pandita kum uwei na ki rangïalehkai dangkhie ba kynsai tam ka India. U la mih madan ruh ïa ki youth team ki club Spain kynthup ka Almeria bad Leganes kumjuh ïa ka Lorca FC.
U Pandita, 23 snem u la wanphai sha India ha u snem 2020 bad ïasoh bad ka FC Goa. U la thep sawkol ïa ka FC Goa ha ka samoi ba la dep.
U Dylan Fox ka Australia, u la shah thied ha ka dor T.30 Lakh ha ka FC Goa.
Une u rangïalehkai ba dang 27 snem ka rta u la paw pyrthei bad ïoh ïa ka jingïaroh hadien ba u la lah ban ïalehkai bha ia ka NorthEast United ha ka samoi ba la dep kat haduh ba ka FC Goa kan soi ïa u mynta u snem.