Thombor ka kynhun runar ïa ki nongbylla ba pyntrei ïa ka St. Xavier’s College, ïap 1 & mynsaw 7

Mawkyrwat, Rymphang 25: Ha kawei ka jingjia ba sngewtriem, ka kynhun jong ki runar bym lah ban tip ki dei kiei ha ka miet jong ka 24 tarik Rymphang ki la leit thombor da kaba tied bad shoh da ki tiar pynmynsaw ïa ki 8 ngut ki nongbylla na Assam kiba la wan ban pyntrei ïa ka St. Xavier’s College ha Umoid, South West Khasi Hills District ha kaba uwei u la ïap noh katba 7 ngut kiwei pat ki la mynsaw jur.

U Fr. Friding Kharsyiemiong, Parish Priest ka Mawkyrwat Parish u la ïathuh ba kane ka jingjia ka la jia ha ka por kumba 11:30 eiei mynmiet ha kaba ka kynhun ba kumba 15-20 ngut ki briew ba la kah durkhmat ïalade, kiba la rah ryngkat bad ki tiar pynmynsaw kum ki wait bad ki dieng ki la bom la tied pynmynsaw ïa ki 8 ngut ki nongbylla katba ki dang ïoh thiah lyngngai.

Ha kane ka jingjia ar ngut ki la mynsaw jur katba kiwei pat kim pat da jur haduh katta katta bad la pynkit noh wut wut ïa ki sha CHC Mawkyrwat na ka bynta ban ïoh jingsumar. Hynrei, ynda la ïoh jingsumar malu mala, ki doktor ka CHC Mawkyrwat ki la phah noh sha Civil Hospital, Shillong na ka bynta ban ïoh ïa ka jingsumar kaba kham bha, hynrei kaba sngewsih ka long ba uwei u nongbylla bar jylla uba la tip kyrteng kum u Raju Mondal (22) na ka shnong Ujanghagrar Char, South Salmara District, Assam u la khlad noh tang hadien katto katne kynta ba la poi ha Civil Hospital.

Kiwei pat kiba la mynsaw ki kynthup ïa u Aminul Islam 35 snem, Abul Mondal 29 snem , Bahadur Sheikh 32 snem , Abdul Bari 42 snem , Shahinnor Alom 21 snem, Yeasin Mondal 45 snem, bad u Amir Hussain 24 snem. Kine baroh 8 ngut ki dei na katei hi kajuh ka shnong Ujanghagrar Char.

U Fr. Friding u la pynpaw ïa ka jingsngewkhia kaba jur halor kane ka jingjia bad ong ruh ba ka long kaei kaei kaba um lah ban mutdur bad khmih lynti ba kan jia namar ba ki phadar Jesuit ki la wan khnang sha kane ka jaka ban seng skul namar ki ïohi ïa ka jingsahdien ka pule ka puthi hapoh ka thaiñ bad ka jingwanrah ïa kine ki nongtrei kiba nabar ruh ka dei namar ban pynstet ïa ka jingshna ïa ki jingtei ba kynthup ruh ïa ka jaka sah jong ki kynthei, hynrei la wan jia pat kum kane ka jingjia ka bym sngewtynnad bad ka bym lah ban pdiang.

“Ngi pynrem jur ïa kane ka jinglong ka jingman kaba khanglad ïa ka roi ka par. Ngi pynpaw ruh ka jingsngewkhia namar kine ki bar jylla ki dei kiba la biang ki kot ki sla bad ki dei ki nongtrei kiba ki phadar Jesuit ki ju pyndonkam ha kylleng ki jaka ban pyntrei jingtrei bad dang shen ki dang wan na Williamnagar ban trei ïa ka College hangtei,” ong u Fr. Friding uba la dawa ba kine ki briew ki dei ban sangeh noh ïa kum kine ki kam pyntriem bad pyndem ïalade ha ki bor jong ka aiñ.

Ki bor pynïaid jong ka College ha ka jingthoh mynta ka sngi ki la ong, ngi la bud ryntih ïa ki kyndon ha kaba ïadei bad ka District Council, ngi la ïakynduh ruh ïa u Myntri Rangbah, u Myntri ka tnat Aiñ, u Myntri Pohïing ba dei peit ruh ïa ka Pule Puthi bad ym tang katta ngi la ïakynduh ruh ïa ki President jong ka KSU bad HYC ban pynsngew ïa ka jingdonkam ban wanrah kine ki nongtrei bar jylla bad baroh ki la pynpaw ïa ka jingkyrshan ïa kane ka jingleh ki Phadar Jesuit.

“Ki dkhot jong ka Managing Committee ki la ïoh jingtip halor kane ka jingjia ba sngewsih bad mynta ki dang ïakren bad ki bor pynïaid ka Jesuit Society ban ïoh ïa ka rai kaba lah ban pdiang. Tad haduh ban da ïoh ïa ka rai kaba lah ban pdiang, ka Education Council jong ka Jesuit Society for North East India ka la rai kut ban pynsangeh noh shwa shipor ïa baroh ki jingtrei ha Umoid bad kane kan kynthup ruh ïa ka jingpynlong class,” ong kane ka jingthoh.

Ki bor pyniad skul ki la ujor ruh da ka FIR pyrshah ïa ki runar kiba donkti ban shoh pynmynsasw bad shim ïa ka jingim jong uwei na ki nongbylla ha Thanad Mawkyrwat bad ki pulit ruh ki la ‘register’ mukotduma katkum ka Kyndon 447/450/324/326/302/34 jong ka IPC.

Haba kren ha u Nongaikhubor, u Superintendent of Police, u bah Maxwell B Syiem u la pyntip ba ki pulit ki la rah noh ïa 3 ngut ki briew ban tohkit halor kane ka jingjia bad ka jingtohkit ba bniah ka dang ïaid shakhmat ban lap ïa ki briew ba donkti.

Previous articleYm pat pyllait ka sorkar ïa ka tied scheme ba la mang da ka FC: Martle
Next articleYm pat kyrkieh ka UDP ban pyrkhat ïa ka Bye elekshon ha Mawryngkneng