T.465 klur bei ka sorkar pdeng ha ki 7 tylli ki jylla, kynthup ka Meghalaya

Ki kor um ba la ioh na ka JJM.

New Delhi, Lber 27: Hynniew tylli ki jylla ba kynthup ka Arunachal Pradesh, Manipur, Meghalaya, Mizoram, Sikkim, Gujarat and Himachal Pradesh ki la ioh ia ka jingsiew namar ka jingpyntrei bha ia ka Jal Jeevan Mission (JJM) na ka bynta u snem 2020-2021.

Ka Jal Jeevan Mission – Har Gar Jal kan pynbiang ia ki kor um ha man ka longiing ha ki jaka nongkyndong shuwa u snem 2024. Ban kot ia ka thong ban ioh ia kane ka jingsiew, ki jylla ki donkam ban pyndep ia ka jingshna ia ki kor bad ban pynlut ia ka pisa ba la mang hapoh ka JJM.

Ki kor um ki dei ban long kiba treikam bad ki jylla ki hap ban pynlut ia ka pisa ba la mang.  Mynta ka sngi, u Myntri Sorkar Pdeng uba dei khmih ia ka tnat Jal Shakti, u Gajendra Singh Sekhawat u la mynjur ia ka song pisa ba T. 465 klur kum ka jingsiew ia kine ki jylla.

Wat hapdeng ka khlam Covid-19 bad ka jingpakhang dam bad ka jingktah ia baroh ki kam, ka jingstet ban pyntreikam ia ka Jal Jeevan Mission ka la long kum ka dak kaba bha bad ha une u snem mang tyngka, palat 3.16 klur tylli ki longiing ki la ioh ia ki kor um. Haduh mynta, ka Andaman & Nicobar Islands, Goa bad Telangana ki la long ki jylla lane ki UT ‘Har Ghar Jal’ bad man ki longiing ha ki 55 tylli ki distrik bad 85 hajar tylli ki shnong ha ka ri ki la ioh ia ki kor um.

Naduh ba la pynbna ia ka Jal Jeevan Misson ha ka 15 tarik u Nailar, 2019, haduh mynta, 4 klur tylli ki longiing ki la ioh ia ki kor um bad lyngba kane la kyntiew ia ka jingpynpoi um lyngba ki kor um na ka 3.23 klur (17%) sha ka 7.20 klur (37.6%) ki longiing ha ki jaka nongkyndong ha ka ri. Kane ka pyni ia ka jingstet jong ki kam ban pynbiang ia ka um ba khuid sha baroh ki longiing ha ki jaka nongkyndong.

Ka Gujarat ka long kawei na ki jylla ba kham pyntrei bha ia ka Jal Jeevan Mission. Ka Gujarat ka la sdang ia ka prokram ban pynbiang um naduh u snem 2002 bad ka la kong ka dak jong ka jingpyntreikam bha ia kane ka skhim. Ka Gujarat kaba ju tip mynshuwa kim ka jylla ba ju pynbiang um lyngba ki tanker bad ki rel mynta ka la weng ia ka jingeh kaba iadei bad ka jingbiang ka um. Hadien ba la mad ia ka jingkyrduh um ha kine ki shiphew snem, lyngba ka jingsdang ia ka Jal Jeva Mission, ka Sorkar Himachal Pradesh ka la trei bor bah ban saindur ia ki rukom treikam bad ban pyntreikam ia kine ki jingsaindur ban pynthikna ia ka jingpynbiang um ha man ka thliew iing ha ki jaka nongkyndong.

Ki jylla ha ka thain shatei lammihngi, watla ki long ki jaka rilum bad kiba rben ki khlaw, ki la pyntreikam bha ia ka JJM. Kane ka dei ka sien kaba nyngkong ba 5 tylli ki jylla ha ka thain ki la ioh ia kane ka song tyngka na ka jingpyntreikam bha ia kane ka prokram. Ka tnat Jal Shakti ka thew ban pynkhlain shuh shuh ia ki kam ban pynpoi um lyngba ka jingpyntreikam ia ka JJM. U Myntri Sorkar Pdeng, u Shekhawat u la pynlong katto katne ki jingialang ban peit bniah bad ban leit jngoh ia ki kam ha ki jylla ka thain shatei lammihngi ban pynstet ia ka jingpyntreikam ia kane ka skhim. Ka National Jal Jeevan Mission ka la phah katto katne tylli ki kynhun riewshemphang ban ai jingiarap ia kine ki jylla ban kham pyntrei bha ia kane ka skhim. Hapoh ka JJM, kine ki jylla ka thain shatei lammihngi ki la long kiba la pyntreikambha ia kane ka skhim.

Ka jingpynbiang ia kane ka song tyngka hapoh ka Jal Jeevan Mission ka la wanrah ruh ia ka jingialeh hapdeng ki jylla bad ki UT ka ban iarap ban pyntreikam kham stet ia kane ka mission kaba wanrah ia ka jingkylla kaba khraw. Kane ka mission ka thmu ban pynbiang ia ki kor um ha man ka thliew iing ha ki jaka nongkyndong shuwa u snem 2023 ban wanrah ia ka jingkylla ha ka rukom im jong ki briew.

Hapoh kane ka mission, ka thong mynta ka la kylla sha ka jingpynbiang ia ka um dih sha man ka longiing ha ka jaka ban pynbiang ia tang ki jingdon jingem. La ai shibun ki jinghikai ban kham pyntbit ia ki engineer bad kiwei kiwei ki briew ha ka imlang sahlang ban pynthikna ka jingpoi umdih ha man ka thliew iing. Hapoh kane ka prokram, ka tnat Public Health Engineering bad ki Gram Panchayat/ Village Water & Sanitation committee ki don ka bynta kaba khraw ha kane ka kam.

Ha u snem mang tyngka 2020-21, la mang T. 11,000 na ka bynta ka Jal Jeevan Mission (JJM) bad la pynbiang ia ka grant sha ki Jylla/UT katkum ka rukom treikam jong ki ban pynbiang ia ki kor um bad ka rukom pyndonkam ia ka pisa ba la ai sha ki jylla na ka bynta kane ka kam..

Previous articleBa la jan ka lyiur, donkam ban pynlong kloi ïa ka elekshon shiteng samoi
Next articleNga lait iap na ka jingiashoh dhar ha u snem 1979:Prestone