Suba ka Congress ba thmu ka sorkar ban aiti ïaka MeECL sha ki karkhana shimet

U Zenith Sangma

“Nalor ka kam CMD, bat u Khembhavi sa 8 tylli ki kam”

Shillong, Naiwieng 25: U Nongïalam ka seng Congress u Zenith Sangma u la ong ka sorkar jylla ka dei ban shimkhia mardor ban pynbeit ïa ki kynrum kynram hapoh ka MeECL naba ka lah ban poi sha u pud ban aiti sha ki riewshimet ban pynïaid ïa kane ka tnat sorkar.

“Ngim lah ban tip ba ka sorkar ka leh khnang ban pynmih ïa ka jingbym ïaid beit ïaid ryntih ki kam ki jam ha ka MeECL la ka long ha kaban pynïaid ïa ka kam ne pisa pilaiñ bad kiba bun ki kam kila pulom lut, bad ka jingkylli kaba mih mynta ka long, hato ïoh kane ka dei kaba la leh khnang da ka sorkar jylla ne ka dei namar ka jingbym don ka jingshemphang ban pynïaid ïa ka kam” ong u Zenith Sangma. 

U Zenith ula ong ka sorkar pdeng ka don ïaka jingthmu ban aiti sha ki karkhana shimet ban pynïaid ïaka kam sam bording elektrik ha ka ri India baroh kawei bad bun ki seng bad ki kynhun bapher kynthup ïa ki nongtrei jong ka MeECL ki pyrshah jur ïa kane ka jingthmu jong ka sorkar pdeng.

U Zenith u la ong, ki nongtrei ka MeECL kila pynpaw ïaka jingbynniaw halor ka jingbym ïoh tulop thikna bad wat kito kiba la shongthait na ka kam ruh kim ïoh tikna ïaka Pension ne bai bam tymmen.

“Nga la kren bunsien halor ka jingbujli khah khah ïa ki khliehduh jong ka MeECL bad dang shen la thung ïa u Arum Khembhavi uba dei u ophisar uba dang khynnah kum u khliehduh jong kane ka tnat bad nalor kane ka kyrdan u la bat ruh haduh 8 tylli ki kyrdan treikam kiba heh kynthup kum u Director of Corporate Affairs jong ka MeECL, Additional Secretary jong ka tnat Mining & Geology, Commissioner of Taxes, Director of Mineral Resources, Additional Mission Director State Rural Employment Society, Registrar of Society, Superintendent of Stamps bad u bat ruh kum u Inspector General of Registration” ong u Zenith  bad ka bynrap “Ka long ka bym lah ban long, ba uwei u briew un bat haduh katei tylli ki kam kiba heh bad kiba khia ban ai ka jingshakri kaba janai ïa u paidbah”.

U la ong, une u ophisar u hap ban treikam hapdeng kiba bun ki jingshah tynjuh ha ki bor kiba halor bad kine ki briew kiba don ha ka bor synshar ki jied ïa kum kitei ki ophisar ban pynurlong ïaka jingkwah ka jongki bad da kaba buh ïaki ha ka jingeh bad lada don kano kano ka jingbakla yn hap ban bahkhlieh hi da u ophisar.

U Zenith u la ong ka MeECL haduh mynta kam shym la don ïa uno uno u briew u ban shimti ïaka kam Director of Finance naduh u Naiwieng 2017.

“Mynta la 3 snem, kane ka sorkar kam shym la lah ban thung ïa u Director of Finance jong ka MeECL bad kumno yn lah ban pynïaid ïaka pisa pilaiñ khlem u khliehduh jong katei ka tnat bad ka don ka jingthmu kaba sha lyndet halor ka jingbym thung ïa u Director” la ong u Zenith.

Previous articleNoh synñiang ka Seng Khasi Tyrsad da ka ïing sha ka kong Melinda
Next articleHa ka rta ba 60 khlad noh u Diego Maradona