Sma politik ka jingbuh bom IED bad byrngem ka HNLC:Prestone Tynsong

Conrad Sangma bad Bah Prestone Tynsong

Shillong Risaw 05: U Symbud Myntri Rangbah ka jylla u Bah Prestone Tynsong u la ong, ba ka jingleit buh bom bad ka jingbyrngem byrsit ka HNLC ka i kumba ka sma politik.

“Ka jingleit buh bom mynnin bad ka jingbyrngem kaba la mih ha ki kot khubor mynne, ka i kumba ka sma politik namar ba u Bah Lamphrang Blah u rung sha ka NPP mynta ka sngi, i kumba ka don kaei re kaei. Ha ka riti synshar ka ri, ngi don ïa la ka jong ka hok bad ki nongthep vote ki don ïa la ka jong ka hok ïano ïano ba ki dei ban vote ne ïa jied kano kano ka seng kaba ki kwah ban rung bad ym don mano mano ba lah ban khang ïa ka mon jong u riewshimet katkum ka riti synshar ka ri India” ong u Bah Prestone Tynsong haba ïakren bad ki nongthoh khubor, hynne ka sngi ha Mawphlang.

U la ong, ka NPP kala ïakren shai ba kan ïaid beit shakhmat bad ym dei ban tieng ne smiej namar kam lah ban long ban byrngem byrsit tang ïa ka NPP bad wat ki paidbah nongshong shnong kin ym lah ban pdiang ïa kaba kum kane ka jingleh.

U Bah Tynsong u la ong, ka jingleit buh bomb ka HNLC hakhmat ka ophis treikam ka NPP ka long  pyrshah ïa ka riti synshar ka ri bad kam lah ban long ban phah mih noh ne ban phah resaiñ noh na kano kano ka seng.

“Nga kyrpad ïa ki khun samla ba kin ym kren kulmar ïa kaei kaei ka bym dei ban kren namar ha kaba khatduh ha ka riti synshar paidbah ka shong ha ka mon jong uba bun balang bad ka shong ha ka mon jongu paidbah ban mon ïa uno uno u kyrtong” ong u Bah Tynsong bad ka bynrap, “Ngi pynshlur ïa baroh ki paidbah jong ki 3 tylli ki konstitwensi kiba dei ban leit thep vote, ba kim dei ban sngewthuh bakla la ki dei na kano kano ka seng ne wat ki kyrtong shimet ruh, ki paidbah ki don ïa ka hok ban kyrshan ïano ïano kaba ki mon”.

U Bah Tynsong u la ong, “Ngi don hangne ban ïakren bad ngi lah ban ïakren ha kano kano ka por bad kam don kano kano ka jingkhang ne ka jingeh bad ngi lah ban ïakren na ka bynta ka jingbit jingbiang jong ka jylla hi baroh kawei”.

Katba u Myntri Rangbah ka jylla u Conrad K Sangma u la ong, jingbyrngem ka HNLC ka long shi sngi shwa ba u Bah Lamphrang Blah (MDC) un rung sha ka seng NPP bad ka jia ruh ha ki sngi shwa ban don ka ilekshon, kumta ym lah ban kyntait ba ka lah ban don ka jingïadei ha ka kam saiñ pyrthei.

“Hato ka HNLC ka tieng ba ka NPP kala sdang ban khlaiñ katba nang mih ki sngi bad kine ki rukom byrngem byrsit kin ym ktah eiei ïa ka seng. Ngi don hangne ban ïakhun na ka bynta ki paidbah bad ngin ym pyndem tdong ïa kum kine ki jingtynjuh kiba wan hakhmat jong ngi” ong u Myntri Rangbah ka jylla bad ka bynrap, baroh 3 ngut ki kyrtong ka NPP kiba ïakhun ïa ka ilekshon shiteng samoi kin kheit ïa u soh jong ka jingjop ha ka ilekshon.

“Kum ka seng saiñ pyrthei ngim sngewtynnad ïa kum kane ka rukom leh. U Symbud Myntri Rangbah bad ma nga, ngi kren shai ba kane kam dei ka rukom ban jia ha ka kam politik. Ngi pynrem jur ïa kum kane ka rukom leh,” ong u Conrad.

U Myntri Rangbah u la ong, ka sorkar kan sa khmih bniah ïa ka rukom treikam ban ai jingïada bad jingshngaiñ bad ka tnad pulit kan sa khmih bniah lada ka long kaba donkam ban pynkhlaiñ ne pynjur shuh shuh ïa ka jingpahara.

Previous articlePynliem ka Tynring ïa ka Madanrting
Next article“Ka polisi treikam ka sorkar, ka pynbor ïa ki samla ban kieng atiar”