Shah rai rem uba pynpuh ïa ka tnga da u ‘seiñ Cobra

Bseiñ Cobra

Thiruvananthapuram, Risaw: Ka kashari ha  Kollam district ha ka Lah sngi U Blei ka 11 tarik u Risaw ka la rai rem ïa uwei u briew uba la pynïap ïa la ka tnga da kaba pynpuh da u bseiñ cobra.
U nongbishar ka Kollam additional sessions court u judge M. Manoj u la  pynbna ba la rai rem ïa u Suraj halor ka jingdonkti ha kane ka kam beaiñ bad ïa ki rai ban pynsaja ïa u yn sa pynbna ha ka sngi Balang.
U Suraj u dei u tnga jong ka samla kynthei kaba 25 snem ka Uthara kaba la shah pynpuh ha u ‘seiñ cobra. Hadien ba la rai rem ïa u Suraj, haba u nongbishar u la kylli lada u don eiei ban ong, u khlem jubab eiei. U nongïasaidaiñ u la pynpaw ïa ka jingkyrmen ba ka kashari kan ai ïa ka jingpynsaja kaba paka tam ïa une u runar bad ki la ñiew ïa kane ka mukotduma kum kawei kaba kham pher bha.
U Khlieh ka Police u Anil Kant u ong ba kane ka mukotduma ka long kaba eh bha bad baroh ki jingïaroh ki leit sha ka kynhun pulit kaba la tohkit ïa kane ka kam beaiñ da kaba pyndonkam ïa baroh ki jingstad saïan haba ïa dei bad ka jingtohkit. U hynmen jong ka Uthara u ong ba u kmen bad kiei kiei kiba la rai bad mynta u dang ap sa ïa ka jingpynsaja kaba paka tam ban ai ïa u.”
Kane ka jingjia ka la jia ha ka 6 tarik u Jymmang, 2020.Ha ka 7 tarik u Jymmang ka kmie jong ka Uthara ka la lap ïa ka metïap jong ka ha ïing jong ki ha  Anchal, kaba jngai kumba 70 km na Thiruvananthapuram. Ka kmie ka la ong ba ka Uthara bad u Suraj ki la leit sha ka kamra jong ki ban bamja miet. Ha ka 7 tarik u Jymmang, u Suraj, uba ju khie sngi, u la khie dang step bha bad u la leit shabar. Haba ka  Uthara kam khie shuh, ka kmie jong ka ka la leit sha kamra jong ka bad ka la lap ïa ka  Uthara ba ka la thiah ïapler.
U Bseiñ u ïai don hapoh kamra, la pynïap noh da ki kmie ki kpa ka Uthara haba ki la wanphai ïing na hospital hadien ba la dep pynbna ïap ïa ka khun jong ki. Ha ka 24 tarik u Jymmang, ki pulit ki la kem ïa u Suraj bad ïa u paralok ba ïarap ïa u Suresh, u ba im ja (professional) haba kem bseiñ kiba la ïasylla ban pynpuh da u bseiñ ban pynïap ïa ka.
Hadien ba ki pulit ki la sdang ban tohkit, ki la sei biang ïa u bseiñ ba la dep tep bad ki la phah eksamin ïa une u bseiñ. Ka jingtohkit ka pynpaw ba u Suraj u la pyrshang bunsien hashuwa kane ruh ban pynïap ïa ka Uthara.
Ki kmie ki kpa jong ka ki la ïathuh ba ka la shah puh ha ka sien kaba nyngkong ha ka 2 tarik u Lber, ka Uthara ha kane ka por ka don ha ïing u tnga ha Adoor. Hadien ba ka la ïohkhiah na kane ka jingshah puh bseiñ, ka la shong la sah noh bad ki kmie ki kpa ha Anchal.
Katkum ki pulit, ki la ïathuh ba u Suresh u la die ïa u bsein sha u Suraj. Nyngkong u la die ïa u sein don bih ha ka dor ba  10,000 tyngka. Hadien ba khlem lah pynurlong ha ka sien banyngkong, u Suresh u la ai pat ïa u cobra ha kajuh ka dor ba 10,000 tyngka. Ïa u khun ba shisnem jong kine ki shijur la aiti noh ha ki kmie ki kpa ka  Uthara ba kin ri sumar.

Previous articleKa rai pynkynriah kharmetor na Ïewmawlong ki long katkum ka aiñ: Conrad
Next articleKyllon ïap 5 ngut ki pulit pahara ha ka jingïasynreit kuli bad ki lehnoh ha J&K