Shah pynbor rung kam khaii met ka khynnah 12 snem

New Delhi, Lber 20: Ha kawei na ki jingjia ha ka nongbah jong ka ri India, kawei ka khynnah kynthei la kynnoh baka la shah rahbor bad ka la shah pynbor ban rung sha ki kam khaii met. Ar bnai hadien, ki pulit ka Delhi ki la ioh ban pyllait ia ka na ka thain jong ka Majnu Ka Tila.

Ha kajuh ka por, ka longiing jong kane ka khynnah kaba dang 12 snem ka ryta ka la kynnoh ia ka jingbym shimkhia jong ki pulit haba khynra bad tohkit haba ia dei bad kane ka jingjia ka la pynlong ban slem ban ioh pyllait ia ka. Hadien ka jingkynnoh jong kane ka longiing, u Station House Officer (SHO) jong ka Kapashera police station u la shah phah sha ka district police line.

Katkum ki pulit, la iathuh ba kane ka khynnah ka la shah rahbor ha ka 22 tarik u Kyllalyngkot bad hadien kane ki la pynbor ba kan rung sha ka kam khaii met, katkum ka Indian Express.

Watla ia ka case la register ha Kapashera police station, hynrei ki pulit ka West district police ki la ioh ban pyllait ia ka. Ia kane ka khynnah la ioh ban pyllait da ki pulit, kata hadien ar bnai.

Haba kynnoh ia ka rukom treikam jong ki pulit ka thain, ka longiing jong ka khynnah ka la kynoh ruh ba arngut kiba donkti haba rahbor ia ka, ki dei ki paramarjan jong ki, hynrei ki pulit kim shym la leheiei pyrshah ia ki.

“Kumba ka long ka don ka jinglehklet halor kane ka kam rahbor. Ngi la phah ia u SHO Kapashera sha district line. Kin sa pynlong ia ki jingtohkit,” ong ka kaiphot jong u Ingit Pratap Singh, DCP (Southwest).

Ha kum kine ki juh ki jingjia ha u bnai Nohprah 2020, kawei kaba dang khynnah na Bihar la kynnoh baka la shah pynbor ban rung kam khaii met ba la pynbor da ka bahaiing jong ka ha Ballia district jong ka Uttar Pradesh. Ia kane ka ruh la ioh ban pyllait ha ka por kaba biang da kynhun synroplang jong ki pulit ryngkat majistor, ki pulit ka Ballia bad ki heh ka Child Welfare Committee (CWC).

Ki pulit ki la iathuh ba dei ka longiing jong ka khynnah kiba la pyntip sha ki heh jong ka CWC ba kaba haiing jong ki, ba la ithuh kum ka Gulshan Bano, ka la ialam ia ka khun kynthei jong ki sha Ballia bad baka la pynbor ia ka ba kan rung sha ki kam khaii met.

Ki dkhot jong ka longiing ka khynnah ki la pyntip ruh sha ka CWC ia ka jaka ba la buh ia kane ka khynnah. Ki heh ka CWC mardor ki la pyntip sha ki pulit, hadien kane baroh ar kynhun ki la leit ban khynra ia ka jaka ba don ki kynthei ha ka thain jong ka Kotwali police station bad ki la ioh ban pyllait ia ka khynnah. Ia kane ka riew kynthei ruh ki la kem.

Previous articleKhlad u nong Umroi na u COVID-19
Next articleMana tih maw be-aiñ ka Majistor