Shah kynnoh donkti u tnga ka Shilpa Shetty ba pynmih phlim dakait, kem ki pulit

Ka Shilpa Shety bad u tnga u Raj Kundra

Mumbai, Naitung: U kurim jong ka puron ba pawnam bha ha ka phlim Bollywood, ka Shilpa Shetty, u Raj Kundra u la shah kem noh  ha ki pulit  halor ka jingkynnoh donkti jong u, ha kaba shna ïa ki phlim dakait, bad un sa ïoh jingpynshitom tyngeh lada la lah ban pynshisha halor kane ka jing donkti jong u ha katei ka kam.

U Raj Kundra  uba long ruh u nongtrei kam lajong  u la shah kem ha ki pulit jong ka Mumbai Crime Branch  mynha ka miet jong ka Lah sngi U Blei ha u bnai Rymphang jong u snem bamynta. U Raj Kundra  u la don hapdeng ki jingshah kynnoh kiba bun ha kaba ïadei bad ka jingdonkti jong u, ha kaba shna ïa kine ki phlim dakait da kaba pynmih ruh ïa ki ha ki Internet  lyngba kawei ka  apps kaba la tip kyrteng ka Hotshott.

Hadien kine ki jingshah kynnoh, ki pulit jong ka Mumbai Crime Branch ki la  pynlong ka jingtohkit kaba bniah bad dei hangne ba la lap ïa ki sabut baroh kiba pynshisha halor ka jingdonkti jong u Raj Kundra  ha kane ka kam poh jait ne ka kam be-aiñ,  bad ki la lah ruh ban pynshisha ba dei u Kundra uba long u khlieh  jong kane.

Ki pulit jong ka  crime branch ki la don shibun ki sabut ban pynshisha halor ka jingdonkti jong u Raj ha kane ka kam, bad dei halor kane, ba ki la leit ban kem noh ïa u hynnin ka miet.

Ha kaba la pynngat ruh ïa u hapoh ka kyndon aiñ  jong ka IT Act bad ka IPC.  kiba long  ka Section 67 (A)  jong ka  IT (Amendment) Act 2008 bad ka  Section 292, 293, 294, 500, 506 bad  509 jong ka IPC.

Ka juh lada ka ïing bishar  ka shem jingbakla bad rai pynrem ïa u, kumta u lah ban shah set phatok haduh 5 snem eiei haryngkat ka jingshah daiñ kuna kaba 10 lak.

Kum ban shu pynkynmaw  ha u bnai Rymphang, ki pulit jong ka Mumbai, ki la kem ïa 8 ngut ki briew, kynthup ruh ïa ka puron, ka Gehana Vashisht, bad ïa u nongbud jong u Raj Kundra, u Umesh Kamat, ha ka jingtohkit ka thei pyniriam ka Sagarika Sona Suman  ka la kynnoh pyrshah ïa u  Raj Kundra.

Hadien kane ka Sagarika  ka la ong ha ki lad pathai khubor  ba u trai jong kane ka kompeni pynmih phlim dakait u long u Raj Kundra, hadien 5 bnai jong ka jingtohkit  ki pulit ki la kem noh ïa u Raj Kundra.

Shuh shuh la ong ba  kane ka kompeni pynmih phlim dakait la tip kyrteng kum ka Kenrin ba la plie da u Raj Kundra ha ka jing ïa treikam lang bad u  Prakash Bakshi uba shong ba sah ha UK.  U Raj Kundra u la bei tyngka haduh 8  haduh  10 klur tyngka eiei na ka bynta ka porn apps. 

La pyndonkam da ki thei pyniriam bad ki nongakphlim ba thymmai kiba kwah akphlim ha ka Bollywood , ïa kine ki phlim jakhlia la ring bad shim wai, ha ki  ïing sah kai kiba heh  ha  Mud, Gorai, Dana Pani bad ha ki bynta jong ka Mumbai bad hadien kane la phah pat sha Britain bad kiwei pat ki ri  lyngba ka V File. Ka kynhun jong u Prakash Bakshi, ka ju upload ïa kine ki phlim  ha ki app.

Ïa u Raj Kundra la ñiew kum uwei na ki heh saipan ne u millionaire uba dei u nongtrei kam lajong.  U long trai ruh ïa ki jingdon jingem ba 2800 klur tyngka.

U long trai ruh haduh  palat ïa 10 tylli ki kompeni bapher bapher, ha u snem 2009,  ma u bad ka Shilpa Shetty ki la thied ïa ka kynhun ïalehkai  IPL  ka Rajasthan Royal,

haduh mynta ki pulit ki la kem ïa 11 ngut kiba donkti ha kane ka kam.

Previous articleBteng sam marbam ka Child-Line sha ki longïing ba don khyllung ha Ri Bhoi
Next articleKa jingpynbeit pud Meghalaya-Assam, kan long katkum u pud ki Hima Khasi:UDF