Shah kem u lehnoh ka Pakistan na Delhi, kurup AK 47 bad ki kuli

Mohammed Ashraf

New Delhi, Risaw: U Lehnoh nong Pakistan u la shah kem ha  Delhi ha ka Lah sngi U Blei bad une u lehnoh u la shong la sah ha India mynta la 13 snem eiei lyngba ki kot ki sla thok, ïathuh ki pulit hynne ka sngi Hatmajai.

U Mohammed Ashraf (40) u la rung shapoh India lyngba ka Bangladesh halor ka jingbthah jong ka ISI Pakistan bad u la shong la sah kum uwei na ki nongsyntiat jong ki, ong u Pramod Kushwaha, Deputy Superintendent of Police, Special Cell sha ki nongthoh khubor.

Une u lehnoh u la thmu ban hiar thma ban pynjot ïa ki nong India ha kane ka por leh niam puja jong ki Hindu.

Hadien ba la tohkit ïa u, ki pulit ki la ïoh kurup ïa ka AK-47 rifle, 60 tylli ki kuli rifle, ar tylli ki pistol, 50 tylli ki kuli bad u bom hand grenade narud wah  Yamuna, ong u Kushwaha.

Ki la ïoh kem ïa u lyngba ka jingtrei shitom jong ka special cell ba la khlieh da u Police Commissioner u Rakesh Asthana. “Ka la long ka jingïoh kem kaba biang palat da ka special cell hashuwa ka tamasa lehniam. Ka jingthmu ba shyrkhei ban pynjot la shah pynpulom noh,” ong u Asthana.

Ki pulit ki ïathuh ba u Ashraf u dei na Narowal ha Pakistan’s Punjab province bad u dei u ba la shah hikai pyntriem ha ka  ISI hadien ba u la pas ïa ka Class X.

U Kushwaha u la ong ba u Ashraf u la donkti ha kiba bun ki kam pyntriem jong ki lehnoh, kynthup ïa ki kam pyntriem ha Jammu bad Kashmir bad hashuwa kane u la sah ha Ajmer, Kashmir bad kiwei ki nongbah. Ha Delhi, u pulit u la ong, u Ashraf u la sah ha Shastri Nagar bad ha Laxmi Nagar. U la leh mynleh kum ki riaw niam bad u la donkti haba ai dawai u doktor jakoid ban buhrieh ïa ka jingithuh jong u. Ïa u Ashraf la kem na ïingsah jong u ha Laxmi Nagar’s Ramesh Park.

Uwei u nong Pakistan uba la ïaid ha ka kyrteng buhrieh jong ki u Nasir u ju ai ïa ki jingbthah sha u Ashraf bad u ju pynbiang ïa ki tiar bthei bad tiar siat, ïathuh ki pulit. U Ashraf u ju ïoh pdiang ïa ka pisa lyngba ka jingphah na ka hawala, u la bynrap.

U Ashraf u la ïoh ïa ki kot ki sla nong India da kaba shu leh ki kot ki sla thok bad u la leit bar ri ruh sha Saudi Arabia bad Thailand lyngba ka Indian passport, ong u pulit. U la ïathoh ruh ïa ka kynthei ha Ghaziabad hynrei u la iehnoh hadien, ki la bynrap.

U trai ïing barim jong u Ashraf u la ong ba un ïa trei ryngkat bad ki pulit haba ïa dei bad ka jingtohkit, ong ka kaiphot.

“U la sah hangne la 6 bnai. I pa jong nga i la ïoh ïa ka Aadhar Card kum ka kot jingpynshisha. Hadien bau la ieh, ngim ju kham ïakren shuh bad u. Lada donkam, ngin ïa trei ryngkat bad ki pulit,” ong u Uzaib, trai ïing barim jong u.

La pyngngat kyndon ïa u Ashraf ha ka kyndon Unlawful Activities (Prevention) Act, Arms Act, Explosive Substances Act.

Ka kashari Patiala House Court mynta ka sngi ka la bat ïa u Ashraf ha ka kti ki pulit na ka bynta 14 sngi.

Previous articleHap ïakhun u Bah Esron kum u kyrtong shimet
Next articlePynïap ki pulit ïa u heh saipan, shah kem 4 ngut