Shah kem 4 ngut ha Umsning, kurup drok ba T.52 lak

Ki pulit ka Ri Bhoi katba ki dang jurip bniah ïa u drok

Nongpoh, Lber 31: Tang hapoh 2 sngi eiei, ba ki pulit ka Ri Bhoi distrik, ki la ïoh ban kurup ïa u drok heroin ba shongdur da palat 3 klur tam napoh kawei ka jaka hajan ka khyrdop khrong khajna ka NHAI ha Pahammawlein, mynta ka janmiet pat ki pulit ki la ïoh ban bat sa ïa kawei ka kali ha ryngkat ki 4 ngut ki briew kynthup ïa u draibar ha kaba la ïoh ruh ban kurup ïa u drok heroin u ba la antad ban shongdor haduh 52 lak tyngka eiei.

Katkum ka jingtip ba la ïohlum, la ong, ba ïa kitei ki saw ngut ki briew kynthup ïa u dribar ka tourist taxi, ki pulit ki la ïoh ban bat noh ha ka surok Umsning Bypass kiba la pynap shrip tang hadien ba ki la ïoh ïa ka jingtip halor ka jingïaid lynti jong katei ka kali kaba la kit lang ruh ïa u drok heroin.

La ïohlum khubor ruh, ba katei ka kali kamai tourist kaba la shah bat noh ha ki pulit ka dei kaba la don ïa u number ML 05 S 6275, kaba la kit ruh ïa ki lai ngut ki briew kiba thmu ban leit sha nongbah Shillong ha kaba u wei na kitei ki briew u dei u ba na Mizoram, u wei na West Bengal bad u wei pat na Assam.

Na ka liang ki pulit, tang mar ïa ïoh jingtip halor ka jingthmu jong ki briew ban shalan ïa u tei u drok u ba shongdor haduh 52 lak eiei, ki la pynap shrip noh ha Umsning Bypass bad tang hadien katto katne por, ki la ïoh ban bat syndon ïa katei ka kali ha ryngkat kitei ki saw ngut ki briew bad ki la pynlong ruh ïa ka jingtohkit kaba bniah.

Previous articleAi jingiarap u MLA mar T.10 hajar sha 24 tylli ki DS Mawlai
Next article“Donkam ban jied ki nongialam ban kyntiew i’a imlang bad ki longkmie”