Monday, October 25, 2021

Shabar ka jylla, pynkilan met ka MCA ïa la ki nongïalehkai kriket

Shillong, Nailur 15: Kum shibynya ban pynkhlain bad ban pyntbit ïa la ka kynhun ïalehkai, ki bor pynïaid ka Meghalaya Cricket Association (MCA) ki la shim ïa kawei pat ka sienjam, kata ban phah ïa la ka kynhun ialehkai U-19 criket sha la shlem ai jinghikai ka Vadodara Cricket Academy.
Ka jingiohlad ka MCA ban phah ïa la ki khynnah sha kine ki shlem ai jinghikai ka la wan lyngba ka jingïakren bad ki bor ba dei khmih jong ka Varoda Cricket Association kaba don ha jylla Gujrat. Haba ïadei bad kane, u secretary ka MCA, u Bah Gideon Kharkongor ha ryngkat u vice-president, Bah Dipul Ryntathiang ki la ïoh ïa ka lad ban ïakynduh ïa u CEO bad Director ka Vadodara Cricket Association (VCA).
Ka jingïakynduh ka long ban ïakren bad u na ka bynta ban thaw ia ki lad ki lynti kumno ban kyntiew ïa ka kriket ha ka jylla Meghalaya. Ka jingiakynduh ka MCA bad kitei ki nongïalam ka VCA ka long shibynta ban ioh pynkilan met ia ki nongialehkai shabar ka jylla namar ka jingbym tikna ka jinglong ka suinbneng hapoh ka jylla kaba ktah ïa ki jingïalehkai namar bunsien na ka daw ka jingpynthut noh u slap lah ban ïalehkai kriket tang hapoh lai bnai.
Ka VCA ka dei kawei na ki shlem kaba kyntiew ïa ka kriket ha India nalor ba ka biang lut ïa ki jingdonkam kiba ïadei bad ka kriket bad kane kan dei ka kabu ksiar ïa ki khynnah ïalehkai kiba don shisha ka jingthrang ban long ki khlur ïalehkai kriket ha ka ri.
Ki khynnah ïalehkai ka MCA ki pynpaw ïa ka mynsiem kmen namar ki ïohlad ban kilan met ïalade ha ki madan kiba kylluid bad kiba kyrpang. Ha kane ka shlem kilan met ka VCA ki don lut ki jaka kilan met bapher bapher kiba kynthup ïa ka gym, pungjngi um, bad kawei pat kaba kham kongsan ka dei ba ki khynnah ïalehkai na ka jylla ki ïohlad ban aireng pyrshah ïa ki khynnah na kiwei pat ki shlem ai jinghikai jong kiwei pat ki synjuk ïalehkai kriket ha ka ri.
Kane ka shlem ai jinghikai ka VCA ka la dei ruh katto katne ki khlur ïalehkai kriket bna nam ha ka ri kum u Munaf Patel bad ki shipara ki Pathan.
Nalor kane ka MCA ka la dep phah ruh ïa la ka kynhun ki thei ïalehkai kriket ka jylla kiba kilan met ialade mynta ha Bengaluru kumjuh ïa ka kynhun ïalehkai U-25 (shynrang) kiba don mynta ha Vizag (Andhra Pradesh) bad kynhun ïalehkai Senior kiba don ha Pondicherry, Tamil Nadu.
Kine ki nongïalehkai ka jylla kin mih madan ha ki tournament ba la pyniaid da ka Board of Control for Cricket in India (BCCI).
Ka dei shisha ka kabu ksiar ïa ki khynnah ïalehkai ka jylla baroh kawei ban ïoh kilan met ha kum kine ki shlem ai jinghikai kiba pawkhmat ha ka ri.
La lap ba kiwei pat ki jylla ki la kiew sted shaba palat haba ïanujor bad ka jylla Meghalaya ha ka ïalehkai kriket, ong u Bah Dipul uba ai khublei kyrpang ïa ki bor pynïaid ka VCA kiba la kloi bad pdiang ïa ki jingkyrpad ka MCA ban pynkilan met ïa ki khynnah ïalehkajong ka.
Nalor kane ka VCA ka la phah ruh ïa la ki nonghikai, kynthup ki coach ban ïarap lem ïa ki khynnah ïalehkai ka jylla.