Rai ka sorkar ban pyntreikam ïa ka MMAR 2021, pynkylla MOU ban pynbiang Internet

Conrad Sangma

Shillong Nailur 13: Ka Sorkar MDA hapoh ka jingïalam u Conrad Sangma kum u Myntri Rangbah ka la rai ban pyntreikam da ka Meghalaya Medical Attendance Rules 2021 (MMAR) bad pyndam noh ïa ka Meghalaya Medical Attendance Rules 1981 (MMAR) bad yn pynkylla ïa ka Memorandum Of Understanding (MOU) ban pynpoi ïa ka Internet Connection sha kylleng ki jaka ka jylla.

U Myntri Rangbah ka jylla u Conrad K Sangma, haba ïakren bad ki nongthoh khubor hadien bala wai ka jingïalang ka kynhun myntri hynne ka sngi ula ong, ka la don ka jingtyrwa ban pyndam noh ïa ka Meghalaya Medical Attendance Rules 1981 bad pyntreikam da ka Meghalaya Medical Attendance Rules 2021, ka jingthmu ban wanrah ïa ka Rule ba thymmai ka long ban pynïaid ryntih ha kaba ïadei bad ka jingai ïa ka Medical Reimbursement sha ki nongtrei sorkar.

“Ha ki snem ba la sep ki don bun ki jingduna bad jingbakla bad kam don ka jingbatai ba bniah ban siew ïa ka Medical Reimbursement sha ki nongtrei sorkar” ong u Conrad bad bynrap ka tnad ka koit ka khiah ka pynpaw ba donkam ban thaw ka Rule thymmai bad lyngba katei ka Rule yn buh ryntih ïa ka jinglut jingsep bai sumar ïa ki jingpang bapher bad bud ïa ka jingbuh dor ka sorkar pdeng katkum ka Central Government Health Scheme Rate.   

Ha kawei pat ka liang u Myntri Rangbah ula ong, mynta la shibnai tam ka sorkar jylla ka la mynjur ïa ka Ordinance ba ïadei bad ka Contingency Fund bad mynta ïa kane ka Ordinance yn rah sha ïingdorbar thawaiñ ha ka dur jong ka Bill, kumta ka sorkar jylla ka la mynjur ban rah ïa ka Meghalaya Contingency Fund 2021 ha ka dorbar synrai ban ïoh ka jingmynjur.

U la bynrap, ka sorkar ka la rai ruh ban pynkylla thymmai ïa ka MOU ba ïasoi ha u Risaw 2014 hapdeng ka tnad Telecommunication ka Sorkar Pdeng, ka tnad Information Technology ka sorkar jylla bad ka Bharat Broadband Network Limited ban pyntreikam ïa ka Bharat Net Project ha baroh ka jylla.

“Ka jingpynthymmai ïa ka MOU ka dei ba ka Bharat Broadband Network Limited ka suki palat ban pyntreikam ïa ka project ban pynbiang Internet ha ka jylla lyngba ki Optic Fibre bad shisien ba la dep ïasoi soskular la bthah ïa ka kompeni ka dei ban pyndep ïa ka projek hapoh 18 bnai ne 2 snem” ong u Conrad bad bynrap ba ka kompeni haduh mynta ka lah pyntrei tang 15 na ka 100 ïa katei ka projek.

U la ïathuh, ka kynhun Myntri ka la mynjur ruh ïa ka jingtyrwa kyrteng ïa katto katne ki briew ban khlieh ïa ka Meghalaya State Redressal Commission bad ki dkhot ka District Consumer Redresaal Commission.

Ka sorkar kan sa ïakren bad kitei ki briew bad shisien ba mynjur kan leh ïa kaba donkam, hynrei halor ka Commision ha ki District, ka sorkar kan pynkhamti ha ka tnad ba dei khmih bad ha u Myntri Sorkar ba dei peit ïa ka tnad ban shim rai.

Previous articleYn ïakhih tyngeh ka Sur Ri Bhoi, ba kuman jingdawa ka Sur Nongmawlai
Next articleLah 3 sngi ka jingtohkit ‘Judicial Inquiry’ ka la ïaid, ong u Conrad