Rah placard ki nongtrei Casual ka tnat ka Koit ka Khiah ban dawa thungkam pura

Ki nongtrei Casual kiba pynlong jingïakhih

Nongpoh, Nailur 09: Namar ka jingbym kheiñ snep ki bor ka sorkar jylla khamtam ka tnat ka Koit ka Khiah ïa kito ki nongtrei bylla sngi lane ki Casual Worker, mynta ka sngi, ki nongtrei Casual Worker kiba trei hapoh tnat ka Koit ka Khiah ki la mih madan hakhmat ka Nongpoh Civil Hospital ban dawa ïa la ka hok khamtam ban pyntikna noh ïa ka kam kaba ki trei mynta la palat phew snem.

            Kitei ki nongtrei Casual Worker kiba don hapoh ka lama jong ka Progressive Health Worker Union ïa kaba la lamkhmat da ka Kong Beril Kshiar kum ka President lem bad u Bah Khraw Lyngdoh, General Secretary, u Bah Khraw Lyngdoh lem bad ki dkhot ki la mih paidbah lang ban ïa lum hakhmat ka Civil Hospital Nongpoh ha kaba la rah ruh ïa ki jingthoh placard bapher bapher ban dawa ïa la ka hok kaba ki deihok ban ïoh.

            Haba kren pat bad ki Nongthoh Khubor, ka Kong A Nongsiej, kaba dei ka Casual Worker ka la pynpaw ïa ka daw bah ba la hap ban mih madan ban dawa ïa la ka hok ka dei tang namar ka jingmynthi jong ka sorkar jylla khamtam ka tnat ka Koit ka Khiah ban phaikhmat halor ka hok jong ki nongtrei Casual.

            Ka la pynpaw ruh, ba lyngba kane ka jingïakhih, ki Casual Worker kiba la shakri la palat 10 snem ki dawa ïa la ka hok ban ithuh ne thungkam pura noh ïa ki katkum ka Meghalaya Regular Casual workers scheme, 1996 bad ruh ba ka sorkar jylla bad ka tnat ka Koit ka Khïah ka dei ban siew tikna ïa ka tulop ka jong ki khamtam ba ki ïoh ruh wat ïa ka jingsiew kaba rit bad ka bym ïahap katkum ka kam kaba kit rei.

            La sakhi ruh, ba ha katei ka jingmih madan jong ki nongtrei Casual Worker, la wan ban ai mynsiem bad ban kyrshan ruh da ka HNYF, Northern Region ïa kaba la lamkhmat da u Bah Marcus Marten lem bad ki dkhot kumjuh ruh la wan ban ai jingkyrshan da u Bah Napoleon Mawphnïang, u ba dei u Invitee member ka Ri Bhoi Progressive Health Casual Workers Union.

            U Bah Marcus Marten, u la ther tyngeh bad ruh ban pynrem ïa ka jingmynthi jong ka sorkar jylla bad ruh ka tnat ka Koit ka Khïah ban sngap ne pynurlong ïa ki mat jingdawa jong ki nongtrei casual kiba la shakri la palat shiphew snem bad dei namar kane bun ki nongtrei ki mat jingeh kiba har rukom, ha kaba u la bynrap, ba ka long ka jinglehraiñ ïa ka sorkar ba kam lah wat ban siew tikna ïa ka jingsiew ïa kine ki nongtrei hynrei ka kam kaba ki trei ka long kaba la palat lïam.

            U la ïathuh ruh, ba halor ka jingdawa jong ki nongtrei Casual Worker kiba la dawa ban pyntikna noh ïa ka kam ka jong ki katkum ka Meghalaya Regular Casual  workers scheme, 1996  bad ruh ban pyntikna ïa ka jingsiew ka jong ki, na ka liang ka seng ka la dawa na ka sorkar bad ka tnad ka koit ka khiah ba kan shim noh ïa ka rai kaba mardor bad lada ka sorkar hi ka dang sngap mynthi la sngewthuh ba kine ki nongtrei casual ki lah ban sangeh noh ïa ka jingai jingshakri ha kane ka tnat bad kan wanrah ruh ïa ki jingeh kiba bun ïa ka tnat ka Koit ka Khïah.

Previous articleByrngem pynjur jingïakhih ka FKGJP, lada ka DC ka dangïai pynibor
Next articlePynïeng ‘Signboard’ ka KSU Ri Bhoi ha ki jaka khappud