Pynrem ka HYC ba shah shoh ki samla na Wahkaji

Kem mardor ia kiba donkti shwa ba ngin thombor ia ki bar jylla:Paliar 

Mawkyrwat, Lber 25: Ka HYC South West Khasi Hills ka dap da ka jingsngew kyndit bd ka pynrem jur halor ka jingshah ktah kti bad shah thombor haduh da mynsaw jur jong ki 3 ngut ki samla Khasi na shnong Wahkaji, South West Khasi Hills District ha Golflink, Shillong dang shen ha ka kynhun ba 20 ngut eiei ki runar kiba dei ki bar jylla suda. 

Kane ka jingjia ka la jia haka miet sngi u Blei ha kaba kumba 20 ngut ki bar jylla ki la shoh bad tied da ki bilor ia kine ki samla ha kaba uwei na ki u lait da ka sait katba ar ngut pat ki la mynsaw jur bad poi hospital. Kumba long mynta uwei na ki samla ba shah shoh u la mynsaw jur ha kaba um pat tip briew haduh mynta ha kaba u la shah sumar ha Super Care bad mynta pat la kit ha NEIGRIMS Hospital namar kim lah shuh ban kyrshan namar ka jinglut.

Na ka liang jong ka HYC ka pynpaw iaka jingsngewdiaw bad ka pynrem jur ia kine ki bar jylla kiba la nud ban ktah kti ia ki trai ri trai muluk haduh da mynsaw jur bad ka seng ka da sngewphylla ruh ba haduh mynta ki dang iaid sahuh namar ka jingphai lyndet bad ka jingbym leheiei jong ki pulit bad ki briew sorkar.

Ka HYC namar kata, ka dawa ia ki pulit ba kim dei ban shim sting bad ban pynbunkam tang ban kem bad pharep ia ki samla Khasi tang shu jia eiei ia ki bar jylla bad ban leh sting pat lada ka don ka jingshah thombor ki trai ri trai muluk. 

“Ka seng ka dawa ruh na ka sorkar jylla ba ka dei ban phah kem mardor ia kine ki runar hashwa ba ka HYC bad kiwei kiwei ki sengbhalang kin thombor naphang ia ki mynder hapoh u pud u sam jong ka South West Khasi Hills,” la maham u General Secretary ka HYC South West Khasi Hills, u bah Moonkingstar Paliar.

“Ka HYC ka dawa ruh ba dei ban siew bai lutksan bad siew bai sumar ia kine ki samla ba mynsaw namar mynta ki don hapdeng ka jingshitom kaba jur bad ia kane ka sorkar ka donkam ban leh noh mardor. Ka sorkar ka dei ban rah ruh sha ki jaka sumar kiba biang ia kine ki samla ba mynsaw jur bad dei ban kem bad pynshitom mardor ia ki briew ba donkti,” u la bynrap. 

U Bah Moonkingstar u la ong ruh ba ka HYC ka kyrpad ia ki Seng Longkmie, ki Rangbah Shnong, ki Seng Niam bapher bapher ba kin mih shakhmat ha kane ka saw ka siañ ba shah thombor ki paradoh parasnam kumba ki la kloi ban mih shakhmat ban pynrem ia ka jingshah thombor u mynder. Ym tang katta ka seng ka buh ruh ka jingkyrpad ia ki nongmih khmat kum ki MLA bad MDC ba kin mih lem shakhmat na ka bynta kane ka mat kaba la pynjem rngiew ia ka Jaitbynriew hi baroh kawei. 

Kyntang iawai na ka liang ka seng ka maham ba lada na ka liang ka sorkar bad ki pulit ki shim sting ia kane, ki pulit bad ki bar jylla kin hap ban shim jingkitkhlieh hi lada jia eiei ia ki bar jylla kiba rung ba mih ha ki thaiñ Wahkaji bad kumjuh ruh ha ka distrik hi baroh kawei, ong u Bah Moonkingstar uba la bynrap da kaba ong, “Ngim lah ban shu iai shah na kawei ka por sha kawei pat ha kaba u trai ri trai muluk un shu iai shah thombor ha la ka bri”.

Previous article“Ka jingkam buh ophis ka RAM ha Nongmynsong ka dei tang ban pynthohbria”
Next articleWanrah CEM JHADC ia ka Mang Tyngka ba duna T.13.15 klur