Pynïap ki pulit ïa u heh saipan, shah kem 4 ngut

Manish Gupta

New Delhi, Risaw: Ar sngi hadien ba la kem ïa ki arngut ki pulit, sa ar ngut ki la kem ha ka sngi Hatmajai ka 12 tarik u Risaw halor ka jingdonkti ha ka kam pynïap ïa u nongkhaïi ha Kanpur u Manish Gupta.

Ka SIT ka la thong  khusnam pisa ba 1 lakh tyngka na bynta uwei u pulit, na ka bynta kiba ai jingtip shaphang jong ki.

U Superintendent of Police (City) Sonam Kumar u ong, “U inspector ba la shah kynnoh u Rahul Dubey bad u pulit constable Prashant ki la shah kem halor ka jingkynnoh donkti jong ki haba pynïap ïa u nongkhaïi heh saipan u Manish Gupta. Ka SIT ka la   thong ruh ïa ka khusnam pisa ba 1 lakh tyngka.”

Ha ka sngi U Blei u Inspector ba la shah sospon u JN Singh bad u sub-inspector Akshay Mishra ki la shah kem na kane ka juh ka jingjia.

U Manish Gupta (36) u la ïap ha Gorakhpur hotel ha ka jingkhynra ki pulit. U don lang bad arngut kiwei ki paralok ha kane ka  hotel.

U heh pulit nyngkong u la kyntait ïa kane ka jingkynnoh bad u la ong ba u la mynsaw na ki bynta jong ka khlieh hadien ba u la ur ha madan namarba u la buaid.

Hynrei hadien la lap ba u la ïap hadien ba ki pulit ki la bom ïap ïa u. Hadien kane la register ïa ka mukotduma pynïap briew pyrshah ïa ki hynriew ngut ki pulit.

Ha kajuh ka por ka tnga u nongkhaïi ka Meenakshi Gupta, ka la dawa ïaka jingpynsaja ban pynïap (capital punishment) na ka bynta kine kiba donkti.

“Kine ki pulit kiba donkti ki dei hok ban shah sdien phasi namarba ki la pynïap ïa u tnga jong nga khlem ki daw kiba biang,” ka la ong.

Previous articleShah kem u lehnoh ka Pakistan na Delhi, kurup AK 47 bad ki kuli
Next articleShi sdie thlieh u riew rangbah ïa ka samla haduh banda ïap