Pyndep ki riew tymmen ïa u tika baar ha Nongpoh, pynshlur de ïa kiwei

Kawei na ka longkmie kaba dang ai tika ha Nongpoh

Nongpoh, Naitung 20: Ka long shisha ka khubor kaban ai mynsiem bad ban pynshlur ïa kiba bun bah ki paidbah nongshong shnong ymtang ïa ka Ri Bhoi District, hynrei wat ïa ka jylla hi baroh kawei, ha kaba wat hapdeng ka jingsaphriang ki khubor pynartatien bad ba septieng ïa u dawai tika COVID-19, hynrei la sakhi pat ba ki nongshong shnong ka sor Nongpoh khamtam kito kiba la kynjoh palat ïa ka 40 snem ka kyrta bun na ki, ki la lah ban pyndep ïa ka jingai tika kaba ar sien lane second dose.

Ïa kane la sakhi biang mynta ka sngi, ha kaba ki nongshong shnong lajan kot spah ngut na ka thaiñ Nongpoh lem bad ki shnong kiba marjan khamtam ki riew tymmen kynthup naduh ki longkmie bad rangbah kiba la kynjoh palat ïa ka 40 snem kyrta ki la leit rung shapoh ka Indoor Stadium ha Nongpoh ban pyndep ïa ka jingai tika ha kaba wat kaba arsien, ha kaba la sakhi ruh, ba ki longkmie ki la palat ïa ka 60 snem shaneng ki la pyni ïa ka nuksa kabab ha ban shim ïa ka lad jingïada na ka jingpang khlam Corona.

Haba kren bad kawei ka longkmie kaba la kynjoh 60 snem kyrta, I la pynpaw, ba kum kawei ka longkmie kaba don ka jingkitkhlieh ym tang ha la iing la sem hynrei wat ïa la ki para marjan marpa, kumta da ka mon sngewbha bad khlem da pynsngap ïa kita ki khubor hamsaïa, I la mih shakhmat ban leit ai tika COVID-19 bad mynta ka kynti pat I la lah ban pyndep ruh wat ïa ka second dose.

I ne I longkmie I Kong Susila Rani, i la pynpaw, ba watla ka jylla hi baroh kawei ka dang don hapdeng ka jingsyrtok namar ka jingsaphriang ka khlam COVID-19, kum ka longkmie I la kyrpad ruh ïa ki riew paidbah ba kin ai ka jingïatreilang bad ki bor sorkar khamtam ka tnat ka koit ka khiah ban burom bad kohnguh ïa ki jingbthah ba la buh da ka sorkar jylla ban ïada na ka jingsaphriang jong kane ka jingpang khlam.

Ha kawei ka bynta, kum ka longkmie ba la rangbah, I la khot la wer lang ïa kiwei kiwei pat ki nongshong shnong jong ka district bad ka jylla bad ka jylla hi baroh kawei ba kin wan shakhmat ban shim ïa kane ka dawai tika da kawei ka jingmut kaba skhem bad ka jingshaniah ïa u ne u dawai bad ruh I la kyrpad ïa ki paidbah ba kin kiar na ka jingpynsngap ïa kita ki khubor hamsaïa kiba pynartatien bad pyntieng ha ba ïa dei bad u ne u dawai tika, namar dei lyngba u ne u tika kum ka jylla shen kan sa lah ban rad dyngkhong noh ïa kane ka jingpang khlam COVID-19.

Previous articleKa Land Act KHADC, ban pynkup bor ïa ki khlieh Nongsynshar
Next articleLah ban kyrduh um ha ka thaiñ Nongpoh ba twa u lum