Pynbna u Conrad ban ai District ia ka Mairang

U Conrad bad kiwei haba plie madan ha Mairang.

Shillong Lber 31: U Myntri Rangbah ka jylla u Conrad K Sangma, hynne ka sngi u la pynbna ba ia ka Mairang Sub Division yn kyntiew kyrdan noh sha ka District namar ka dei ka jingdonkam kaba kyrkieh ki paidbah katei ka thaiñ.

“Ki District kiba don ha tdong eh kadei ka South West Khasi Hills bad ka West Khasi Hills bad kane ka pyni ba ki don ki jingdkoh ha ka rukom pyniaid hakhmat ia ki kam ki jam bad kumta ka long kaba donkam ban don noh ka Administrative Unit ha Mairang,” la ong u Conrad K Sangma bad ka pynbna paidbah ban kyntiew kyrdan noh ia ka Mairang Sub Division sha ka District, ha ka jingialang kaba la long hynne ka sngi ha shnong Manai.  

Nalor kane, u la ong, ka sorkar jylla kala banjur ban wanrah ia ka jingiajan hapdeng ka sorkar bad ki paidbah bad kila don bun ki jingdawa na kiba bun ki liang ha ka jylla ban thaw ia ki civil sub division, district bad administrative unit.

U Conrad u la ong, ia baroh kitei ki jingdawa la khmih da ka High Level Committee kaba la khlieh da u Chief Secretary ka jylla.

“Haba thaw ia ki District kiba thymmai, ka sorkar ka hap ban da khein jingkhein bha ha kaba iadei bad ka jinglut jingsep bad ka hap ban pynshong nongrim ruh hapdeng ka jingthaw thymmai bad ka jingpynkhlain ia kaba la don lypa” ong u Myntri Rangbah.

Ha kane ka sngi, u Conrad Sangma u la plie ia ka Dorbar Hall, ka madan football, ka surok rong, ka jaka shong ki heh ki haiñ ne ka VIP Gallery ha kaba la iadonlang u Lamphang ka iing dorbar thawain ka jylla u Bah Metbah Lyngdoh, u Myntri ka tnad Water Resource u Bah H Brolding Nongsiej, u Myntri ka tnad PHE u Bah Renikton Lyngdoh Tongkhar, ki heh ophisar sorkar na ki tnad bapher bapher bad kiwei kiwei.

Previous articlePyllait im u hymmen ïa u para na ka jingngam jyllop ha Mawlong