Pyllait u MLA ïa ka Music Video, ‘JINGIM’ jong ka SAP Production

U Bah Process T Sawkmie badang pyllait ïa ka jingrwai, ‘JINGIM’.

Shillong, Nailur 14: Ïa ka Music Video jong ka jingrwai Khasi ba la pynbit pynbiang bad pynmih da ka SAP Production ba la jer kyrteng ka ‘JINGIM’ la pylllait hynne ka sngi da u MLA ka Mawlai konstitwensi u Bah Process T Sawkmie ha conference hall kaba don ha MLA hostel ha Khyndailad.

Haba kren kum u Kongsan u Bah Process la pynpaw ïa ka jingkmen ba u la ïoh ban pyllait ïa kane ka jingrwai kaba ki khun samla kiba donsap ki la rwai lyngba ka music video.

        “Ïa ka sap ym don balah ban thied, kumta ngi donkam ban pyndonkam hok ïa ka sap kaba U Blei u la ai ïa ngi,” ong u Bah Process.

            Haba ai mynsiem na ka bynta ki khun samla kiba donsap, u MLA u la kyntu ïa ki ba kim dei ban shaniah (depend) ha kiwei haba sdang ïa ka kam, hynrei ki dei ban sdang hi na lade.

            “Haba sdang nyngkong ïa ka kam ngin mad bad shem beit ïa kiba bun ki jingeh, namar haba sdang yn ym don ba ithuh ïa phi, phi hap ban trei shitom hi bad kaba kongsan eh ka long ba phim dei ban klet ban wad ïa ka khmat U Blei, U ban lam lynti ïa phi,” bynrap u Bah Process.

            U kyntu ruh ïa ka kynhun SAP Production ba kum ki samla kim dei ban duh jingkyrmen ne duh mynsiem namarba un ïai don ryngkat bad ki ha ki liang baroh. Ha kajuh ka por u la kular ïa ka SAP Production ban buh skhim na ka bynta ban kyntiew ïa ka kam jong ki.

            Ha kane ka sngi u MLA u la nohsynñiang ruh da ka song pisa sha ka SAP Production kum shi bynta ban ïarap ïa ki ha ki jingdonkam jong ki.

            Hashuwa kane la ïoh ruh ïa ka jingrwai kyrpang na u samla James Kharsyntiew, ba la rwai ïa ka jingrwai ba la ai kyrteng u, ‘Rangdajied’.

Ha kane ka sngi ba la pyllait ïa katei ka jingrwai Khasi la don ryngkat u John R. Kharlyngdoh, manager, executive producer, Bashan L Mawnai, Director/Producer ka SAP Production bad kiwei.

Haba kren khyndiat shaphang ka SAP Production, u samla Banshan L Mawnai u la pynpaw ba kane ka dei ka kynhun kaba ïarap ban kyntiew ïa ki sap ki phong jong ki samla ka thaiñ kiba donsap ha ka rwai kum ki kaitor bad kumjuh ha ki kam ak phlim kum ki tyngshop bad ki puron.

U kyntu ruh ïa u MLA Mawlai ba un sngewbha ban ïarap ban pynkren lem sha ka sorkar lyngba ki dorbar ba kin ïarap ban kyntiew ïa kum kine jaitkam jong ki Entertaiment Industry.

Previous articlePlie u Bah Hamletson ïa ka kamra skul bathymmai
Next articleShah jied u Bah Aldinal kum u sirdar khynnah ka Hima Riangsih