Puk tur ki paid Elaka Sutnga ha DC ophis, bym patiaw ban khang karkhana Coke

Ki paidbah kiba leit tur sha DC ophis

Jowai, Nailur 13: Naka daw ba ka sorkar Jylla kam patiaw ban leh ei ei halor ka jingmih beaiñ ki karkhana coke kum ki tit haka Elaka Sutnga, wat hadien ba naka liang ki paidbah hapoh ka jingïalam jong ka Environment Co-ordination Committee (ECC) kila pynpaw ïaka jingpyrshah jong ki haki rukom bapher bapher, kumta hynne ka sngi daki hajar ki paid jong ka Elaka kila leit tur biang ha phyllaw ka ophis u Deputy Commissioner, East Jaiñtia Hills District ha Khliehriat ban pynkynmaw ïaka sorkar ba ka dei ban pynduh pyndam syndon ïa kitei ki karkhana coke namar nalor bala shna beaiñ ka buh jingma ruh ïaka koit ka khiah u paidbah.

Ïaka rally kila sdang na Moopala bad ïaid ter ter u surok bah shaduh sha Khliehriat da kaba leit tur sha phyllaw ka ophis u DC ha ryngkat ki placard bad  pynrem jur ïaka sorkar Jylla halor ka jingmynthi jong ka iaka jingdawa jong ki.

U Advicer jong ka ECC u Reading War u ong 31 tylli ki karkhana coke s ba aplai CTE (Consent to Establish) naka Meghalaya State Polution Control Board dei kiba la dep shna lypa wat haba ka aiñ kam shah ïa kino kino ki karkhana ba kin shna shwa bad sa aplai pat ïaka CTE,  bad naka liang ka sorkar wat haba kala tip ïa kane ruh ka khlem leh ei ei ban pynshitom ïaki katkum ka aiñ pynban ka pyrshang ban ai ki kot ki sla.

Nangta kaba pynkyndit ruh ïaki ba ka sorkar ka ong, kito ki karkhana ba la ïoh CTO ki la lah ban trei, hynrei pat hadien ba kila ïoh baroh ki RTI  ki lap ba don shibun ki jingduna naka liang ka sorkar hapoh ki tnat treikam bapher bapher ba ki khlem ïaid katkum ka aiñ. Ha kajuh ka por ruh wat hapdeng ka jingïakhih jong ki ruh dang don biang kiba ïoh jingbit. 

“Ka jingkwah jong ngi ba wat kito bala ïoh CTO (Consent to Operate) ruh ki dei ban khang khyrdep, bad kaba khatduh hi ngi khlem kwah ïaka CTE ne CTO,  namar ka aiñ ruh kam shah, wat ka Supreme Court ruh kala batai ba ïaki Hazardous Industries ym dei ban ai jingbit iaki ban shna hajan ki jaka ba shong ba sah briew, bad sa kawei ruh ka ong, Ka hok ban pyllait naka jingjakhlia jong ka mariang, la pynlong kum ka hok ban im”  ong u Reading War.

Kumta u kyntu ïaka sorkar ba ka dei ban pyrkhat bha namar ha East Jaiñtia ki ïoh um da ka pyllang umslap, katba kine ki karkhana pat ki pynmih ïaka lyer ba jakhlia (carbonic acid) ka ban sa pynlong ïaka um bym bit shuh ban pyndonkam.

Haka jingïalang ba la pynïaid da u chairman ka ECC u D.H.Mallang kaba la pynlong ha Moopala bad ha phyllaw ka ophis u DC la don ruh ka jingïasoi kyrteng halor ban pyrshah ïaki karkhana coke, bad ruh naka liang ki nongkren ba kynthup naduh ki dkhot ka ECC, ki khun samla, ki longkmie longkpa jong ka Elaka bad kiwei kila pynsngew ïaki jingeh ba kila mad haka pateng mynta bad ong ka jingktah ba kham kongsan kan sa jia haka pateng shakhmat. 

Hadien bala kut ki nongai jingkren ha phyllaw ka ophis u DC, naka liang u DC bah E.Kharmalki ula hiar kren hakhmat ki paidbah da kaba ong ba ïa kane ka jingdawa jong ki un sa pynsngew sha ka sorkar lyngba ki jingthoh bala aiti daki dkhot ka ECC ha kane hi ka sngi.

Previous articleYm tang ki shynrang, ki kynthei ruh ki ri masi khem dud, ong u bah Piston
Next articleKlun u bar jylla 2 akar ka jaka ban buh karkhana jri ha Mawsmai