Phah tuklar ka HYC ïa ka aiñ khang Khaïi masi ka Assam

U Robert Kharjahrin ba dang kern sha ki lad pathai khubor

Shillong Naitung 20: Ka Hynniewtrep Youth Council (HYC) hynne ka sngi ka la leit ban iakynduh ia u Symbud Myntri Rangbah ka jylla u bah Prestone Tynsong ban dawa ba ka sorkar kan tuklar haba iadei bad ka Assam Cattle Preservation Bill, 2021 namar kane ka Bill kan ktah ia ka jylla Meghalaya bad lada ka Assam ka pyntreikam ia kane ka Bill ruh ka dei ban weng ia ka kyndon jong ka Section-7.

U President ka HYC u bah Robertjune Kharjahrin haba kren hynne ka sngi sha ki lad pathai khubor, u la ong ba ka seng ka dawa ba lada pyntreikam ia kane ka Bill dei ban weng ia ka Section-7 ha kane ka Bill namar ka ktah palat ia kane ka jylla bad katei ka Bill jong ka Assam kam dei ban ktah ia ka jylla Meghalaya bad ia kiwei ki jylla ba majan jong ka Assam.

“Ha kane ka kyndon jong ka Section-7 la kdew ba lada uno uno u briew uba kit ia ka masi ne ka muid na kawei ka jylla sha kawei ka jylla dei ban pan jingbit na ka sorkar Assam bad sa kawei ka kyndon kaba ktah ia ka jylla ka long ba ka sorkar Assam kam shah ban die ia ki masi ne muid na Assam sha kiwei ki jylla lada kim don ia ki ain ban iada ia ki masi,” ong u bah Robertjune.

U la ong ba katei ka kyndon 7 ka long kaba beain ha ka Riti synshar ka ri India bad la bynrap ba kano kano ka sorkar jylla kam lah ban shna ain halor ka jingiakhaii para jylla.

“Kumno ka Assam kan tuklar ia ki kam khaii hapdeng ka Meghalaya bad kiwei ki jylla,” u la ong bad la bynrap ba ka jingpyrshang ka sorkar Assam ban pynkmen ia ki paid Hindu ka long pynban ban ktah ia ka bor bad ka iktiar jong ka sorkar jylla.

U bah Kharjahrin u la ong, “Na ka liang jong u Symbud Myntri Rangbah ka jylla u la pynpaw ba kane ka long beain bad u la kular ba un sa shim khia ia kane ka ban iakren bad ka sorkar Assam.”

Na ka liang ka seng ka la ai jingmut ba ka sorkar jylla kadei ban tuklar halor kane Bill bad ka jylla Meghalaya kadei ban trei shitom ban pyndap ia ka jingbam doh katkum ka jingdonkam ha kane ka jylla.

“Ngi la tyrwa ba ka sorkar jylla ka dei ban wanrah da ki skhim bad ki jingiarap khnang ba ki briew ha kane ka jylla kin lah ban ia ri ia ki syiar, sniang, Masi bad ym dei ban shu shaniah ha kiwei ki jylla,” u la ong.

Shuh shuh u la ong ba lada ki stad ka sorkar jylla Meghalaya kim treh bad kim lah ban iada ia ka jylla kadei ka kamram jong ki sengbhalang ban shim ia ki lad ki lynti.

“Lada ka sorkar jylla kam lah shuh ban iada ia ka jylla Meghalaya ka dei ka kamram jong ngi ki sengbhalang ban iada bad wat haduh ban leit tied ia ka khyrdop jong ka Iing Bishar ka Supreme Court ruh ngim banse ban leh,” u la ong.

Previous articleKa jingpynbeit pud Meghalaya-Assam, kan long katkum u pud ki Hima Khasi:UDF
Next articleKa Land Act KHADC, ban pynkup bor ïa ki khlieh Nongsynshar