Palat da ki spah ngut ïap bthei bom ha jaka mane ha Afghanistan

Ka jaka mane ba bthei bom ha Afghanistan

Kabul, Risaw: Kumba 100 ngut ki briew ki la shah pynïap bad bun kiwei kiba la mynsaw ha kawei na ka jinghiar thma ïa ka jaka mane ki riewngeit Shiite (Shiite mosque) ha nongbah Kunduz ha Afghanistan ha ka sngi Thohdieng. Kane ka jinghiar thma ka la jia hadien ba ki la don kumba shi dorjon ngut ki briew kiba shah hiar thma ha jaka mane (mosque) ha Kabul
Ka thymmei khubor na ka hospital, ka ïathuh ba ki la don kumba 50 ngut kiba ïap ha Kunduz jong ka Afghanistan na kane ka jingshah hiar thma ka jaka mane.Hashuwa kane ki nongtrei ka hospital ha Kunduz ki la pyntikna, “Ngi la ïohpdiang ia palat 90 ngut kiba la mynsaw bad palat ïa ka 15 tylli ki metïap, hynrei ki jingkheiñ kin nangïai kylla. Ngi dang ïai ïohpdiang bun shuh shuh ki briew.”Ha ka juh ka por ka kynhun lehnoh Taliban ka la pyntikna ba kane ka jingshah hiar thma bashyrkhei ka la don hynrei kam shym la ai ïa ki jingkheiñ jong kiba ïap na kane ka jingjia.
Ki nongshong shnong jong ka Kunduz ki ïathuh sha ki lad pathai khubor ba kane ka jingpynbthei bom ka la jia ha jaka mane jong ki riewngeit Shiite ha ka por ba ki dang duwai ïa ka jingduwai sngi Thohdieng kaba ki dang ïa mane hapoh ka jaka mane. Tad haduh bathoh ïa ka khubor ym pat shym la don ba kam ïa ka jingkitkhlieh halor kane ka jinghiar thma pynbthei.
U Zalmai Alokzai, uwei na ki nongkhaïi ka thaiñ uba la leit mardor sha Kunduz Provincial Hospital, la ki doktor ki donkam snam ne em khnang ba un ïoh ban ai sngewbha halor kane ka jingbthei bashyrkhei.
“Nga la ïohi ïa palat 40 tylli ki metïap,” u ïathuh sha ki lad pathai khubor. “Ki kali kit nongpang (Ambulance) ki la leit phai biang ban kit ïa kiba ïap.”
Ka Kunduz ka don ha ka jaka ba ka ïoh ka kot bad ka khaïi pateng ka ïaid bha kaba ki ïa khaïi bad ka Tajikistan. Ka la long ka thma kaba shyrkhei hadien ba ka Taliban ka la ïakhun tyngeh ban wan ha ka bor mynta u snem.
Bunsien ka ju shah hiar thma ha ki riew shit niam ka Sunni, ki riew ngeit Shiite ki la shah ktah bha ha ki katto katne ki jaka ha Afghanistan, da ka jingshah pynbthei bom, ka jingshah hiar thma ki hospital bad ka jinghiar thma kyndit kyndit.
Ki riew ngeit Shiites ki don kumba 20 percent na ki paidbah nongshong shnong ka Afghan. Bun na ki ki dei ki Hazara, ka kynhun kiba shah thombor ha Afghanistan da ki phew snem.

Previous articleSan ngut kiban ïakhun na Rajabala konstitnwensi
Next articleBatbor u kpa ïa 2 ngut ki khunrit, watla lynñiar sngap mynthi ka kmie bad u kñi