Oh dor palat pud ki auto ïa ki khynnah skul, maham tyngeh ka FKJGP

Nongpoh, Nailur 15: Hadien ba la mih ka jingujor na ki katto katne ki kmie ki kpa jong ki khynnah skul ka thaiñ Byrnihat halor ka jingshimkabu jong ki nongñiah auto da kaba oh dor bai shong auto palat ïa kaba dei ban siew, mynta ka sngi, ki nongïalam ka FKJGP, Byrnihat Circle ki la pynlong ïa ka jingïakynduh lang bad ka synjuk ki nongñiah auto jong ka thaiñ Byrnihat bad ruh ban maham jur ïa kiwei kiwei pat ki nongñiah auto ba kim dei ban shim kabu ïa ka dor palat ïa kaba dei ban shim.
Ha kane ka jingïakyn-duh lang bad ka synjuk ki nongñiah auto rickshaw ka thaiñ Byrnihat, na ka liang ka FKJGP Byrnihat Circle la lamkhmat da u samla Henry Nongrum, President, u Noah Khongstid, General Secretary, u Bah Kitbor Suting bad u Bah Devos Chyne nalor kiwei kiwei.
Ha kane ka jingïakynduh lang bad ka synjuk ki nongñiah auto rickshaw, na ka liang ka FKJGP ka la ïoh ban twad jingmut halor kane ka jingshim kabu ban oh dor palat ïa ka dor ba dei ban shim na ki nongleit nongwan khamtam halor ka jingoh dor ïa ki khynnah skul kiba ju leit ju wan man ka sngi na Byrnihat sha Narbong bad ruh ïa kito kiba kamai na Byrnihat sha Umling.
Halor kane ka jingujor jong ki kmie ki kpa ki khynnah skul halor ka dor shong auto rickshaw, na ka liang ka FKJGP ka la rai ban buh jingmaham kaba tyngeh ïa kino kino ki nongñiah auto rickshaw ba kin kiar na ka jingshimkabu ban oh dor ïa ki khynnah skul bad lada ka seng hi ka dang ïoh ïa kum kine ki jingujor, kam banse ban shim pat da kiwei ki lad kiba tyngeh.

Previous articleBitar ka HITO ïa ki bor District ba khang leit ïing Dorbar Synrai
Next articleJurip ki enjiniar, bor District bad Rangbah Shnong