Ngi la pynkhreh lada jia ba khie biang ka khlam COVID-19: Conrad Sangma

Shillong, Lber 18: U Myntri Rangbah ka jylla u Conrad K. Sangma u la ong, ba ka sorkar jylla ka lah pynkhreh lada jia ba ka khlam COVID-19 ka khie biang ha ka kylla ba-ar.

 “Ngi lah pynkhreh na ka bynta kane. Ha ka jingshisha baroh ki jylla ki la long kiba la pynkhreh ia mynta. Ngim dei ban sngewkyndit namar ba kane ka khlam ka la saphriang biang ha kylla ba-ar ha kylleng ki ri bad mynta ngi la iohi ruh ba ka la wan jia ruh hapoh ri India” ong u Conrad K Sangma haba iakren bad ki nongthoh khubor ha ka sngi Palei jong ka taiew.

 U la ong, ba ki paidbah ruh ki la long kiba la pynkhreh ha ka pyrkhat pyrdain ka jong ki haba ia nujor bad ka jingsaphriang ka COVID-19 ha shwa ba kan khie biang ha ka jylla.

 “Ngi lah pynkhreh bha mynta wat ha kaba iadei ruh bad ka jingpynbiang ia kiba bun ki jingdonkam. Ngi kyrmen skhem ba kane ka jingkhie biang jong ka khlam kan ym wan jia hapoh ka jylla. Hynrei lada ka wan jia ruh ngi long kiba la pynkhreh bha haba ianujor bad ka por mynshwa ba ka khlam sdang saphriang nyngkong ha ka jylla” ong u Myntri Rangbah.

 U la kyntu ruh ia ki paidbah ka jylla ba kim dei ban khein sting ne leh sting ia kane ka khlam, wat lada ki la dep ai tika ruh ne haba ki peit ka jinghiar jong ki briew ban ioh ia kane ka jingpang.

 U la pyntip, ba ha ka jingialang kaba la lum da u Myntri Rangbahduh ka ri u Narendra Modi ha ka sngi Balang, u Myntri Rangbahduh ka ri, u la kren shai ha ka jingialang ba ia kaei kaba la dep jia mynshwa kam dei ban jia biang mynta ka kynti.

 “U Myntri Rangbahduh ka ri, u la ong ba ki jylla ki donkam ban peitngor bha ha kaba iadei bad ka leit ka wan bad ula bthah ruh ia ki jylla ban pynthikna ba ki nongleit jingleit kylleng dei ban lum thup ia ki jingtip halor jong ki” la ong u Myntri Rangbah ka jylla.

 U la iathuh, ka sorkar ka la phah rejistar thikna ia ki nongwan jngohkai kiba wan rung sha ka jylla bad la rai ruh ba ki briew kiba wan na ki jaka kiba la tip kum ki High Risk Zones kum na Maharashtra, Kerala bad kiwei kiwei ki jylla ki dei ban leh ia ka RTCPR Test ha ka jaka kaba ki rung shapoh ka jylla bad la pynmih ruh ka jingpynbna ha kaba iadei bad katei ka bynta.

 U Myntri Rangbah u la pynshai, ba ka sorkar kam shym la bthah ia ki briew kiba wan na kiwei ki jylla ban shong pynkyrpang ialade hynrei ka ban jur ba dei ban pyndep iaka jingleh iaka RTPCR lada jia ba kim don iaka syrnod ba kim don ia u COVID-19.

 Halor ka jingkylli la ka jylla ka don jingthmu ban pynjari biang ia ka khangdam ne Lockdown ha ka jylla, u Conrad u la ong, ba kumba long mynta hi la lah ban tehlakam ia kane ka jingpang da ka jingtrei shitom jong ki nongshong shnong, ka jingiadon bynta lang ka imlang sahlang bad ki nongtrei kiba hakhmat eh.

 “Ngi la lah ban leh bha haba ianujor bad kiwei pat ki jylla kiba don ha ka thain bad ia mynta hi ngim pat iohi ban donkam ban pynjari ia ka khangdam, hynrei lada jia ba ka khlam ka saphriang bad ka jinglong jingman ka sniew, ngin hap ba bishar bniah bha ha kata ka por” la ong u Myntri Rangbah.

 Halor ka jingkylli, kumno ka sorkar kan leh ia ki briew na ka jylla Assam kiba don hapdeng ka elekshon, u Conrad u la ong, ka sorkar ka la pynlong kongsan ia baroh ba ki dei ban leh iaka test haba ki wan rung sha ka jylla.

 U la ong, ka jingphah rejistar ia kiba wan shapoh ka jylla kan iarap shibun ban lap mardor ia ki briew kiba ki iakynduh bad ban buddien ia ki nongjngohkai kiba wan sha ka jylla bad u kyrmen skhem ruh ba kiwei ki jylla ruh kin bud lang ia kane ka nuksa ha ka ban phah rejistar ia ki briew kiba wan na shabar.

Previous articleAi jingmut ka Lokayukta ban phah tohkit CBI ia ka jingkhaii tuh dewiong
Next articleKa por kan poi ba ngin ym ioh bam doh masi: PT Sawkmie