Ngam kwah ka ophis ba plie kan long ka ‘Ophis Sngi Iew’: ong u CEM

U Bah Titos Chyne ba plie ophis KHADC bad kiwei ki MDC.

Mawkyrwat, Lber 24: U Chief Executive Member (CEM) ka Khasi Hills Autonomous District Council (KHADC), u Bah Titos Chyne ha ka Sngi Balang u la plie pyrda ia ophis treikam bathymmai jong ka KHADC ha Mawkyrwat, South West Khasi Hills District ha ryngkat ka jingiadonlang u Nongialam ka Liang Pyrshah, u Bah Lamphrang Blah, u Deputy CEM, Bah Gigur Myrthong lem bad kiwei kiwei ki EM ka KHADC.

Haba kren ha ka jingialang, u Bah Titos u la pynpaw ia ka jingsngewkmen kaba khraw ba u la ioh ia kane ka lad ban plie ia kane ka tnat ophis jong ka Council mynta ka sngi, kaba long ruh artad ka sngi ba ka Executive Committee ba u ialam ka dap shisnem pura thik.

U la iathuh ba ka Council ka la angnud ban plie ia kane ka tnat naduh mynshem snem, hynrei namar ka jingwan jong ka khlam COVID-19, la hap ban buhteng noh.

U la iathuh ba ia kane ka ophis la sdang ban pyntrei ha u snem 2019 ha jinglut kaba baroh ka poi haduh T.1.60 klur tam, kata, T.1.32 klur na ka bynta ka iing bad T.22.32 lak na ka bynta ka lynti iaid kjat bad ka jingker.

U bah Titos u la ong ba mynshwa ka ‘main branch’ jong ka KHADC hangne ka Mawkyrwat ka dei tang ka Professional Tax, hynrei na ka bynta ban pynsuk bad ka jingmyntoi jong ki paidbah kane ka thain, ka EC mynta ka don jingthmu ban wanrah pat sa kiwei pat ki tnat treikam ba kynthup naduh ka Khaii Pateng (Trade) bad ka tnat ba dei peit ia ka khyndew (Land).

U la iathuh ruh ba ka EC kan sa thung ruh ki nongtrei kiban peit ia ki skhim MDC bad kumjuh ruh ki nongtrei kiban peit na ka bynta ka jingdonkam jong ki paitbah kiba kwah ban wad ia ki ‘Khasi Tribe Certificate’ bad kiwei de ki kot ki sla ba donkam.

“Ka EC ka la shim ruh ia ka rai ban pynkhlain ia ki District Court jong ngi. Ngi la dep ‘sanctioned post’ thymmai na ka bynta ki Magistrate bad shen hangne ha Mawkyrwat ruh phim donkam shuh ia kaban buh ia kino kino ki jingujor ne mukotduma kiba iadei bad ka District Court namar ba kin sa don ki Magistrate hangne kiban sa shim ban shim bishar ia kino kino ki mukotduma ba iadei bad ki District Court,” ong u Bah Titos uba la kdew ba kane ruh kan sa pynsuk shuh shuh ia ki paitbah ka thain bad kan aikam aijam ia ki nongiasain ain ha kane ka thain.

Namar ka jingangnud ba kane ka ophis jong ka KHADC kan treikam pura, u bah Titos u la iathuh ba ka Council kan sa buh uwei u Office In-charge jong kane ka Branch uban pyntyllun ia ka kam bad kan sa pynkynriah kam ruh ia ki nongtrei sha kane ka tnat khnang ba kan treikam bha.

 “Nga kyntu ia phi ki nongtrei ha kane ka tnat, ba ngam kwah ba kane ka Branch Office jong ngi kan dei ka “ophis sngi iew” kumba ju long bun ki ophis ha nongkyndong kiba ju treikam tang ha ka Sngi Iew, hynrei kadei ban treikam ha baroh ki sngi long trei na ka bynta ka jingmyntoi jong u paitbah,” ong u Bah Titos.

Kiwei pat ki la ai jingkren ha kane ka jingialang ki kynthup ia u Nongialam ka Liang Pyrshah hapoh KHADC, u Bah Lamphrang Blah, u Deputy CEM, Bah Gigur Myrthong bad u EM ba dei peit ia ka tnat Council Building, Bah Teiborlang Pathaw. Kiwei pat kiba iadonlang ki long u EM ka tnat Trade, Bah Rangkynsai Kharbukhi, u EM ka tnat Revenue, Bah Mitchel Wankhar, u EM ka tnat Elaka, Bah Jambor War, u EM ka tnat Development, Bah Martle Mukhim, u EM ka tnat Arts and Culture, Bah Victor Rani bad u MDC ka Mawkyrwat, Bah Carness Sohshang uba pyniaid ia ka jingialang.

Previous articleDuh kam bylla ki trai shnong, ba wan ki bar jylla ha Ri Bhoi Sepngi
Next articleNgi dawa ïa u James ban weng na ka tnad bording:Bindo