Mynta yn ïaid Peace rally ki paidbah ka thaiñ

Mawkyrwat, Rymphang 26: Sa 2 ngut ki briew kiba la suba jur ba ki lah ban donkit ha ka jingthombor ia ki nongbylla bar jylla na Assam kiba la wan ban trei ia ka St. Xavier’s College Umoid, South West Khasi Hills District ki la shah kem noh ha ki Pulit Mawkyrwat ha ka miet Sngi Palei.

Katkum ki tyllong khubor ba la ioh lum, la ong ba ia kitei ki briew baroh ar ngut kiba dei hi na katei ka thain Diwah-Umoid la kem noh da ki pulit ha ka por 12:30 AM eiei. La iathuh ruh ba 2 ngut napdeng ki 3 ngut ki briew kiba la rah noh da ki pulit ha ka Sngi Palei, ki la lait noh ha ryngkat bad ka jingteh kyndon katba ia uwei pat la kem noh hadien jong ka jingtohkit.

Ki tyllong khubor ki iathuh ruh ba ia baroh lai ngut kitei kiba la shah kem la leit rah noh sha Iingbishar mynta ka sngi bad ki pulit ki la ioh ruh 3 sngi ka Police Custody na ka bynta ban tohkit shuh shuh.

Na ka liang jong ka Dorbar Shnong Shait-Shait Umoid ha ryngkat bad ka Synjuk ki Nongsynshar Shnong Diwah-Umjarain Area ha ka jingialang kaba la long ha ka miet Sngi Palei ki la rai ban pynlong da ka Peace Public Rally ha ka Sngi Saitjain naduh ka por 11:00 baje mynstep na Iew Umjarain sha madan Shait-Shait Umoid ban pyrshah halor kane ka jingjia ba sngewsih.

La iathuh ba baroh ki paitbah nongshong shnong jong ka Pynden Diwah, Diwah Shadmoit, Shait Shait Umoid, Umjarain, Mawsdei bad Lawblei bad kynthup ruh ia ki khynnah skul kin iashimbynta ha kane ka jingiaid paitbah da kaba kin rah ruh ia ki Placard bad ki lama iong ban pynpaw ia ka jingpyrshah bad ka jingpynrem halor kane ka jingjia, kaba kim lah satia ban pdiang. Kumta, ka Synjuk ka la kyrpad ruh ia baroh ki riew shimet, ki longkmie longkpa bad kumjuh ruh ki samla bad khynnah skul bad ruh ki sengbhalang napoh ka District bad ka Jylla ba kin wan ban iashimbynta ha kane ka rally.

“Na ka liang jong ka Synjuk ryngkat ki paitbah ngim kdew kti iano iano halor kane ka jingjia, hynrei ngi pynrem ia ki briew kiba leh ia kane ka kam bymman,” ong ka kyrwoh.

Lah ban kdew hangne ba 8 ngut ki nongbylla napoh ka ka shnong Ujanghagrar Char, South Salmara Mankachar District, Assam ha ka miet Sngi Balang ki la shah shoh shah tied dusmon ha ki riew bym ithuh durkhmat katba ki dang thiah lyngngai ha ka jaka sah jong ki ha St. Xavier’s College ha Shait-Shait Umoid. Ha kane ka jingjia, uwei u nongbylla u la khlad noh hadien katto katne por ba la poi ha Civil Hospital, Shillong katba 7 ngut kiwei pat ki la mynsaw jur.

Previous articleMynjur ka kynhun myntri ban ïarap pynsiew khajna ïa ki IAS, IPS, IFS
Next articleYn pynmih hukum u DC halor ban ïada ïaka wah Myntdu