Mynjur ka komiti ban ai tika Covaxin ïa kiba naduh 2 haduh 18 snem

New Delhi, Risaw : Ka long ka khubor kaba sngewsarong na ka bynta ka India haba ïakhun pyrshah ïa u COVID-19, hadien ba ka Subject Expert Committee (SEC) ka la ai ïa ka jingmynjur sha ka Drugs Controller General of India (DCGI) na ka bynta ban pyndonkam ïa u tika Covaxin ka Bharat Biotech na ka bynta ki khynnah kiba naduh ka  2 haduh ka 18 snem ka rta, ong ka kaiphot ha ka sngi Hatmajai.

U Covaxin, yn ithuh mynta kum uwei na ki tika COVID-19 banyngkong ba lah ban ai ïa ki khunlung khynnah.

Kane ka la urlong hadien shi taïew ba ka thymmei khubor ka la kam ba Bharat Biotech, kiba la dep pyndep ïa ka jingpyrshang jong ka Phase 2/3 jong u Covaxin ban ai ïa ki khynnah haduh kiba hapoh ka 18 snem, ki la aiti ïa ki kot ki sla sha ka Central Drugs Standard Control Organisation (CDSCO) na ka bynta ban pynshisha bad ban ïoh ïa ka jingmynjur na ka bynta ka Emergency Use Authorisation na ka bynta une u tika.

“U Covaxin uba thmu pyrshang ha ki khynnah kiba naduh  2 snem haduh ki samla kiba hapoh ka 18 snem ki la dep aiti sha ka  CDSCO… Kane ka la urlong na kadaw ba u don ha ka rynsan jong ka jingshngaiñ bad ki sakhi kiba biang ba la pyrshang (trial) ha Phase 1,2 bad 3 ha kiba heh,” ong ka thymmei khubor.

U AIIMS professor dangshen u la kam ba ka jingpyrshang kaba dang shu dep leh shen ka pyni ïa ka jingshngaiñ bad kabym leilei ban ai ïa ki khynnah kiba haduh kiba 18 snem shaneng. U Dr Sanjay K Rai,u professor ha ka Centre for Community Medicine, AIIMS, u la ïathuh sha ka  ANI ba ka jingpyrshang ïa u Covaxin la leh ha ki lai tylli ki kynhun.

“Ka group banyngkong la eksamin hapdeng ki 12 -18 snem, ka group kaba ar hapdeng  6- 12 snem bad balai hapdeng 2-6 snem,” u la ong.

Ha kaba nyngkong ngi la pyndep ïa ka eksamin jong ki briew kiba hapdeng ka rta ba 12- 18 snem bad hadien kane ïa kiwei ki group. U Covaxin u long uba shngaiñ bad ka bor ruh ka long kumjuh. Hynrei ki dang ap ïa ka result bakhatduh jong kine ki jingpyrshang,” u la bynrap.

Ka World Health Organisation (WHO) shen kan sa ai ïa ka jingmynjur ïa une u tika Covaxin ha kane ka taïew. Kane ka met kaba heh jong ka pyrthei bad ka kynhun laitluid jong ki riew shemphang ki la dep buh por ban ïakynduh ha kane ka taïew ban khmih ïa ka jingma bad ban bishar bniah bha bad ban ai ïa ka rai kaba khatduh la ki mynjur ne em ïa une u Covaxin.

Lah ban kdew ba ïa une u tika Covaxin la shna da ka kompeni na Hyderabad ka Bharat Biotech ha ka jingïatrei ryngkat bad ka Indian Council of Medical Research (ICMR), kumjuh bad ka National Institute of Virology (NIV).Kiba la dep ai tika COVID-19 ha India ki la jan kot sha ka 100 klur ngut bad la khmih lynti ba kan tam ïa ka 95.89 klur ha ka sngi Hatmajai.

Previous articleYn kyrshan ka HSPDP ïa ka UDP ha Mawphlang
Next articleHap ïakhun u Bah Esron kum u kyrtong shimet