Marwei ïakhih ka Kong Angela ban dawa pyllait noh ïa ka pisa ki nongbylla

Ka kong Angela Rngad kaba shong iakhih

Shillong Naitung 19: Hakhmat ka khyrdop jong ka Secretariat shong kyllain mungor marwei ka nongialam ka Thma U Rangli (TUR) ka kong Angela Rangad ban dawa na ka sorkar ba ka dei ban pyllait noh ia ka pisa jong ki nongbylla kiba la sahkut la shi snem naduh ba don ka khlam COVID-19.

Ka nongialam ka TUR ka kong Angela Rangad haba kren hynne ka sngi sha ki lad pathai khubor, ka la ong ba kane ka dei ka jingsdang ban pyniohsngew sha ka sorkar ba ki briew ki iakynduh jingeh shisha bad kim lah ban kyntait ia ka kamram ba ki dei ban leh.

Ka kong Angela kaba dei ka nongialam ka TUR, ka la ong ba mynshem snem haba wan ka khlam COVID, ka sorkar ha u bnai Lber ka la pyntip ba na ka Chief Minister Relief Against Wage loss scheme kan ai jingkyrshan T.2100 sha ki nongbylla sngi kynthup ia ki nongkamai kali, ki nongtrei iing briew bad kiwei de.

Ka kong Angela ka la ong ba na bynta kito ki nongbylla kiba la don kyrteng lypa bad ka Board of Construction Workers Welfare kin ioh T.5000 bad hadien katto katne bnai la wad bniah ba ki nongbylla sngi bad kim shym la ioh pdiang ia katei ka pisa.

“Bun ki paidbah na Garo Hills, Khasi Hills, Jaintia bad na kylleng ki la pyntip ba ki khlem ioh pdiang ia ka pisa kumba la thoh hynrei ki ioh pdiang tang T.700 bad ki don kiba la aplai na ki shnong hynrei kim shym la mih kyrteng,” ong ka kong Angela bad la dawa ba ka sorkar kadei ban batai sha kito kiba khlem mih kyrteng balei kim shym la mih ka kyrteng.

“Ngi la ioh lum 1400 sla ki jingujor na ki paidbah bad la phah sha ka sorkar jylla kum ka dorkhas na bynta ba kan khmih namar ba ki paidbah kim shym la iohpdiang ia ka pisa,” ka la ong.

Kane ka nongialam ka TUR, ka la ong ba kane ka long kum ka jingban bein ia ki paidbah namar ba ka sorkar ka ai ruh ia u nombor phone bym treikam bad ki paidbah kim ioh shuh ban ai biang ia ka kyrteng bad ia u Account number.

Ka kong Angela ka la ong, “Kane ka kam ka la sahteng la shi snem bad ngi la aipor ia ka sorkar hynrei haduh mynta ka sorkar ka la leh bym suid niew ia u duk u suk nalor ba ki iakynduh jingeh shisha naba don ka khlam.

Ha kajuh ka por, ka kong Angela ka la kdew ba ka skhim MGNREGS ruh kam shym la treikam hok ha ki thain nongkyndong kumba la ioh jingtip na ki nongialam shnong.

Ka la ong ba ia kane ka skhim MGNREGS dei ban pynkiew na ka 100 sngi sha ka 150 sngi  bad la dawa ba na bynta une u snem, ka sorkar kadei ban pyntip ban ai ka jingkyrshan ia kiba kamai mynsngi bam mynmiet.

 “Ngi iohi ba ka sorkar ka dangn mastieh pynlut pathar bad ka dang bamsap hynrei ia ki jingeh ba bun balang ka khlem pyrshang ban wad ia ki lad lynti,” ka la ong.

Previous articleKyrshan dawa Civil Sub Division ka HYC Mawlai
Next articleWat ïa i barit ruh kam lah, shaei kan lah ka sorkar ban pynbeit ïa u pud:Angela