Lyngba ka IRAD yn pynduna jingtakhuh kali ha ka jylla

Ka kong RV Suchiang kaba dang pdiang syntiew

Shillong Risaw 12: Ka Chief Secretary ka jylla ka Kong RV Suchiang hynne ka sngi kala pyllait paidbah ia ka Integrated Road Accident Database (IRAD) ha ka jingialang kaba la long ha Conference Hall, jongka Secretariat.

Haba kren ha ka jingialang ka Kong Suchiang kala pynpaw namar ka jingkiew kynsan jong ka jingjia aksiden ha kylleng ka ri, kumta ka Supreme Court kala pynmih ia ki jingbthah sha baroh ki sorkar jylla ba kin ialeh ban pynduna ia ki jingjia aksiden ha ki surok.

Ka la ong, da ka jingsdang pyntreikam ia ka IRAD kan iarap shibun ban pynsngewthuh ia kiba bun halor ka jingdonkam ban shim ia ki lad jingiada haba niah ia ki kali ha ki surok ban lait na ki jingjia aksiden bad kala banjur ba dei ban ialeh ban pynbeit noh mardor ia kino kino ki jingma ha kino kino ki jaka kiba ju mih ki jingjia aksiden.

Ka Chief Secretary kala ong, ba ka long kaba donkam ban pynsngewthuh ia ki paidbah halor kane ka phang bad kala kyntu ia ki nongniah kali khamtam ia ki samla ba ki dei ban tip ruh iaki kyndon aiñ bad ki dei ban bud ryntih ruh ia ki.

Katba u Additional Director General of Police u H Nongpluh, u la pyntip ba ha ka jylla jan man la ka sngi ki don ki jingjia aksiden bad man la u snem kiba iap ki ju kot sha ka 180 ngut bad u la pynpaw ia ka jingkyrmen ba da jingsdang pyntreikam ia ka IRAD iaki jingtip kiba la lum na baroh ki liang yn lah ban tehlakam ia ki jingjia aksiden bad ula kyntu ruh ia ki pulit ba ki dei ban pyndep hok ia la ka kamram.

Ka IRAD kadei ka lad kaba lum ia ki jingtip lyngba ka kor internet kaban pynlong ia ki tnad bapher bapher kum ka Police, Public Works Department (PWD), Health, Highway bad kiwei kiwei ban ioh ia ki jingtip haba don ki jingjia aksiden bad yn ioh ban khmih ne tohkit bniah, ka rukom shna ia ka surok, ka jinglong jingman jong ka kali bad kumta ter ter khnang ba kan long pat ka lad ban ioh ban khmih bniah ia ka rukom aksiden kali bad ban shim ia ki lad ban pynduna ia ki jingjia aksiden.

Kane ka projek kadei kaba la bei tynka da ka World Bank bad la pyntreikam ia ka da ka Ministry of Road Transport and Highway jong ka sorkar pdeng ryngkat bad ka NICSI.

Previous articleKiew ki kam shah thombor ki kynthei ha WKH
Next articleBun ki seng ki la khylliap lama, ka UDP ka kwah jingïatylli ki seng trai Ri: Bindo