Wednesday, December 8, 2021

Liem salit ka Ryntih ha ka Rajasthan United

Shillong, Risaw 04: Ka Ryntih SC kaba mih madan ha ka sien nyngkong ha ka I-League 2nd Divison ka la shahrem salit da 3-2 ha ka Rajasthan United FC ha ka jingïakhun Bangalore Football Stadium.
Ka RUFC ka la pyni shisha ïa ka jingkhlaiñbor naduh kaba sdang ka jingïalehkai ha kaba ka la thep ïa ka kol ba nyngkong ha ka minit kaba 12 lyngba u Dilli Ram Sanyasi. Mar shu thep ïa kane ka kol nyngkong ka RUFC ka la ïoh mynsiem bha bad pyneh triang bad ha ka minit kaba 45+1 ka la ïohthep sa ïa ka kol kaba ar lyngba u Sukhjit Singh bad tam lypa da 2-0 haduh kaba kut ka kylla step.
Ha ka kylla miet, ka Ryntih khapoh ka jingialam u coach, u Bah Khlaiñ Pyrkhat Syiemlieh ka la sdang wandur ka rukom ïalehkai bad ka la sdang thaw pyrthei da kaba sdang ñion kylla ïa ka liang pyrshah. Hynrei ka RUFC kam shym la duhbor bad khatduh ka la thep sa ïa ka kol kaba lai lyngba u Aman Thapa ha ka minit kaba 67. Watla shahthep da 3-0 pynban ki rangïalehkai ka Ryntih kim shym la duh mynsiem satia bad ha ka minit kaba 78 lyngba u Banpynkhrawnam Nongkhlaw u la thep ïa ka kol nyngkong kaba la pynskhem mynsiem ïa para nongïalehkai.
Ki rangialehkai ka Ryntih ki la ïoh mynsiem na kane ka shikol u Banpynkhrawnam bad pyneh biang triang bad khatduh ka jingtrei shitom ka la seisoh ha ka minit kaba 82 ha kaba u Sheen Stevenson Sohktung u lathep jlang ïa ka kol kaba ar.
Mar shu thep ïa kane ka kol kaba ar ki rangïalehkai ka Ryntih ki la sei biang ïa la la bor ka buit katba ki don ei hynrei sniewbok haduh kaba kut ka 90 minit kim shym la lah ban pynphai ïa ka shikol ba dangsah bad hap pdiang ïa ka namrem.