Lai sngi yn khang ki sengbhalang ïa ki nongtrei ka ophis DMHO

Tura, Naitung 20: Ki sengbhalang na ka thain Williamnagar ki la rai ban pynlong da ka pakhang ia ki nongtrei sorkar ba kin leit trei jong ka ophis DMHO ban pynurlong ia ka jingdawa jong ki, kata ban pyndam noh ia ka jingphah pynkynriah kam ia ki doktor khlem da thung bujli ha ka jaka jong ki.

Kine ki sengbhalang ki kynthup ia ka GSU, AIGU bad FAF kiba la pynlong ia ka jingialang haba ia dei bad kane ka ishu pynkynriah kam ia ki doctor na Williamnagar Civil Hospital khlem da bujli ha ka jaka jong ki.

“Ngi la dep ujor sha u Commissioner & Secretary Health and Family Welfare, sha u MLA ka thain, u Deputy Commissioner bad DMHO ban pynsangeh noh ia ka jingpynkynriahkam ia u doctor Psychiatrist ha ka district khlem da bujli ha ka jaka  jongu ha kaba ki la pynpaw ba ki paidbah ka distrik ki la mad jingeh bha,” ong ki sengbhalang lyngba ka jingujor jong ki.

Shuh shuh ki la bynrap ba ha shuwa kane ki la pynkynriah ruh ia u doctor ba sumar khmat u eye-specialist khlem da thung bujli ha ka jaka jong u bad ki paidbah ka district mynta ki la hap ban iaid jngai bha ban leit phah sumar khmat, bad kiba duk ki la mad jingeh bha namarba kim lah shuh ban leit ba la jngai palat.

“Ym don ba shah shkor ia ka jingkyrpad bad jingud jingnam jong ngi kaba la leit sha kiba kyllut. Ngi la pynlong ia ka jingtah poster haba ia dei bad kane,hynrei ka jingpyrshang jong ngi ka la long lehnohei. Kumta ban pyniohsngew ia ka sur jong ngi bad ban pynjam shakhmat ia ka jingdawa jong ngi (kaba kin thung mardor ia u Psychiatrist bad u Eye-specialist ha Williamnagar Civil Hospital), ngim don da kawei pat ka lad ka lynti hynrei tangban shu pynlong ia ka jingiakhih,” ong u GSU president jong ka EGH, u Saljrang TR Marak.

Ki sengbhalang ki la rai ban pynlong ia ka pakhang ophis balai sngi jong ka ophis DMHO, kata hapdeng ka 27-29 tarik u Naitung ban pynbor ia ki bor ba dei khmih ban pyndap ia kine ki jaka ba suda kloi katba lah. Ki la byrngem ruh ban bteng ia ka jingiakhih lada ki leh bymsuidniew haba ia dei bad kane ka mat.

Previous articleAi Dorkhas ka KSU ba thut ka Network Jio
Next articleÏakynduh ka HYC, SWKH ïa ka DC halor ka jingthungkam