Lah ban kyrduh um ha ka thaiñ Nongpoh ba twa u lum

Ki klong buh pali um (dur rim)

Nongpoh, Naitung 20: Hadien ka jinghap u slap khlem da sangeh mynta ka sngi, ka la don ka jingjia twa lum ha ki bynta jong ka shnong Umsamlem bad ha kane ka jingjia ka la don ruh ka jingshah ktah ha ka liang ki pipe kiba shalan umbam umdih sha ka thaiñ Nongpoh bad kane kan ktah ïa ka jingshalan umbam sha kane ka thaiñ kumba shitaiew eiei.

Katkum ka jingpyntip da ka Deputy Commissioner ka district, ka Kong R.M Kurbah ka la pyntip, ba kan don ka jingshah ktah ha ka liang ka jingsam umbam umdih sha ki shnong ki thaw jong ka thaiñ Nongpoh kaba lah ban shimpor ruh haduh shitaiew eiei namar ka jingmaramot ïa kine ki pipe shalan umbam umdih.

La ïathuh ruh, ba katkum ka jingpyntip lyngba u Executive Engineer ka PHE, Nongpoh Division, la ong, ba namar ka jingtwa kynsan jong u lum ha ki bynta ka shnong Umsamlem, ka la ktah bad pynjulor ïa ki pipe shalan umbam umdih bad ka jingmaramot ïa kine ki pipe kan sdang naduh lashai ka sngi bad kan shimpor kumba shitaiew eiei, kumta la kyrpad ïa ki paidbah ba kin ïaishah shipor bad ruh na ka liang ka tnat PHE kan ïaleh katba lah ban pynkloi ïa kane ka jingmaramor ïa kitei ki pipe um kiba la shah pynjulor.

Previous articlePyndep ki riew tymmen ïa u tika baar ha Nongpoh, pynshlur de ïa kiwei
Next articleAi Dorkhas ka KSU ba thut ka Network Jio