La pynïakhlad ïa ka kam bishar bad kam synshar ha EJH

Khliehriat, Nailar 12: U Chief Justice ka Meghalaya High Court, u Justice Biswanath Somadder hynne ka sngi u la plie ïa u maw sah kynmaw halor ka jingpynïakhlad ïa ka kam bishar (judiciary) bad kam synshar (executive) ha East Jaintia Hills.

Ha kane ka sngi la plie ïa ka ïing bishar bathymmai jong ka District and Sessions Judge, Khliehriat ha ka jingïadon ryngkat jong u Myntri ka tnat Aiñ, u James PK Sangma, u Myntri ka tnat Social Welfare bad u MLA ka thaiñ, u Bah Kyrmen Shylla bad ki nongbishar jong ka Meghalaya High Court, u Justice Hamar Sing Thangkhiew bad u Justice Wanlura Diengdoh, ha ka jingïalang kaba la long ha ka jaka pynïeng kali jong ka DC ophis barim ha Khliehriat.

Haba ai jingkren ha kane ka sngi, u Chief Justice u la ong ba kane kane ka jingpynïakhlad ïa ka kam bishar bad ka kam synshar ka long ban ïarap ban pynsted ïa ki jingbishar ïa ki mukotduma na ka bynta ka jingmyntoi u paidbah. Haba ai khublei ïa ka Sorkar Jylla halor ka jingshim khia ïa kane ka kam, u la ong ba kane ka jingpynïakhlad ka long kaba donkam ban lait ïa ka jingïatyngkhuh namar baroh ar ki don ïa la jong ka bynta ban ai jingshakri ïa u paidbah. “Ka Article 50 jong ka Riti Synshar ka Ri ka kdew shai halor ka jingpyndonkam ban jingpynïakhlad ïa ka kam bishar bad ka kam synshar,” la ong Justice Sommader.

U Myntri ka tnat Aiñ, u la ïathuh ba haduh mynta ki la pyndep ïa ka jingpynïakhlad ïa ka kam bishar bad ka kam synshar ha ki 08 tylli ki distrik bad ka East Jaintia Hills ka dei ka distrik kaba 09. “Ngi dang sah sa ar tylli ki distrik ban pyndep. Kane ka sienjam ka long ban wanrah ïa ka jingbishar hok kham jan sha u paidbah,” la ong u James. U la ïaroh ruh ïa u Deputy Commissioner bad ki heh ophisar kiba la trei shitom ban pyntikna ba ai ïa ka jingbishar hok ïa u paidbah ha ki por ba la leit noh wat hapdeng ki don shibun kiwei pat ki jingkit khlieh.

Haba kren halor ki mukotduma kiba sahteng hapoh ka distrik, u Myntri ka tnat Aiñ u la ong ba ba ki don shibun ki mukotduma kiba dang sahteng bad u ngeit skhem ba lyngba ka jingtreikam jong ka ïing bishar District and Session Judge, Chief Judicial Magistrate bad Judicial Magistrate kan ïarap ban stet ban ai rai halor ki mukotduma kiba sahteng. “Ngi angnud ba ki paidbah kin ïoh jingbishar hok kham kloi katba lah,” u la ong.

Ha kane ka sngi, u Commissioner and Secretary ka tnat Aiñ, u Bah W. Khyllep u la pule ïa ka hukum halor ka jingpynïakhlad ïa ka kam bishar bad ka kam synshar hapoh ka distrik bad u la aiti ïa kane hukum sha ka Registar General ka Meghalaya High Court.  Ha kane ka sngi, ki judicial officer ki la pynithuh ïalade ha khmat ki paidbah kiba la ïadon ryngkat kane ka jingïalang.

Previous articleLa plie biang bad la don doktor ka Rangthong PHC
Next articleYn pyllait paidbah ïa ka Music Video “Ha Jingphohsniew” ha YouTube