Kynthoh u Zenith ïa ka sorkar halor ka Central Bond Warehouses

Shillong, Naiwieng 25: U Nongïalam ka seng Congress u Zenith Sangma u la kynthoh jur ïaka sorkar jylla ba ka jingthmu ban buh ïaka Central Bond Warehouses ka long tang na ka bynta ka jingmyntoi jongno ne jongno bad kala ngop ruh ha ka jingpynbiej jong ki riewshimet kiba kwah ban pynïaid kiad ha baroh kawei ka jylla.

“Da ka jingdon ka Central Bond Warehouses (CBW) tang kumba 2 ne 3 ngut kin tehlakam ïaka kam pynïaid kiad ha baroh kawei ka jylla bad kiwei pat ki bonded warehouse kin hap ban thied ïaka kiad na katei ka CBW bad kin hap shaniah tylli beit ha ki nongpynïaid jong ka CBW bad hashwa ba ka kiad bad ka beer kan poi sha ki Bonded Warehouse yn hap ban siew lypa ïaki khajna baroh bad la leh ïa kane ka kam tang ban pynhun ïa ki katto katne kiba khaïi kiad” ong u Zenith Sangma haba ïakren bad ki nongthoh khubor hynne ka sngi.

U la ong, hadien ba u Bah Metbah Lyngdoh ula iehnoh kum u Myntri Sorkar ban haba ula shah jied bad shimti ïa ka shuki kum u Lamphang ka Ïing dorbar thawaiñ ka jylla, ïaka tnat Excise la bat bad khmih hi da u Myntri Rangbah u Conrad K Sangma bad hadien ba la aiti ïaka tnat Excise ban khmih da u Bah Kyrmen Shylla ha ka jingïalang kaba nyngkong eh jong ka kynhun myntri la shim ïaka rai ban thaw ïaka CBW.

“U Bah Kyrmen Shylla ula ïoh ban khmih ïaka tnat Excise ka dei halor ka jingbuh kyndon ba dei ban mynjur ban thaw ïaka CBW ha ka jylla bad ym dei ban pyrshah eiei ïa katei ka mat bad hangne ngi lah ban sngewthuh ba ka kam bamsap ka ïai mih la ka long ha kano kano ka tnad sorkar”la ong u Zenith Sangma.

“Nga la long teng u Myntri uba khmih ïaka tnat Excise ha ki snem kiba la leit bad kila don ki riewshimet ïa kiba ngam kwah ban pynpaw kyrteng, kiba la wan tyrwa eiei ïa nga ban thaw ïaka CBW hynrei nga la kyntait war ïa katei ka jingtyrwa, hynrei kane ka sorkar kaba mynta kala ngop ha ka jingpynbiej jong kitei ki riewshimet” ong u Zenith Sangma.

Previous articleHa ka rta ba 60 khlad noh u Diego Maradona
Next articleAi jingmut ban pynwandur ïaka pule puthi ha rilum Garo