Kyllon ïap 5 ngut ki pulit pahara ha ka jingïasynreit kuli bad ki lehnoh ha J&K

Ki bor pahara ba dang ïakhun

Srinagar, Risaw: San ngut ki pulit pahara kynthup ïa u junior commissioned officer (JCO), ki la kyllon iap ha ka jingïasynreit kuli bad ki lehnoh ha ka jingkhynra jong ki ha  Jammu bad Kashmir ha ki bynta jong ka Rajouri ha Pir Panjal ranges.
Ka la mih ka jingïasynreit kuli hapdeng ki bor pahara bad ki lehnoh ha ka por ba ki dang pynlong ïa ka jingkhynra lehnoh ha Poonch district. La pynlong ïa kane ka jingkhynra ha ka shnong ba hajan ka DKG ha Surankote hadien ba ki la ïoh jingtip ïa ki jingdon kine ki lehnoh ha kane ka jaka.
Ha kane ka jingkhynra ki lehnoh ki la synreit kuli pyrshah ïa ka kynhun shipai kaba dang khynra, kaba la leit dei kuli ia u JCO bad sawngut kiwei ki heh kyrdan, ong u nongaiktien ka  Defence Ministry. La pynkit mardor ïa kiba mynsaw sha hospital na ka bynta ban ai jingsumar hynrei ki la khlad noh ba la jur eh ka jingmynsaw.
Ki heh ophisar ki la ïathuh ba ki la ïoh ïa ka jingtip halor ka jingdon kine ki lehnoh ha khlaw jong ka Chamrer, hadien ba ki la lah ban ïoh rung lyngba ka Line of Control (LoC). Ki bor pahara hashuwa kane ki la ïoh ban pynïap ïa u lehnoh ha ka thaiñ Hajin jong ka Bandipora district. U dei uba la pynïasoh bad ka  kynhun lehnoh kaba shyrkhei bha kaLashkar-e-Taiba (LeT) bad u la donkti ha kaba pynïap ïa ki riew paidbah ha Bandipora.
“Une u lehnoh ba la shah pynïap la ithuh kum u Imtiyaz Ahmad Dar ba la pynïasoh bad ka kynhun pyntriem ba shyrkhei ka LeT (TRF). U la donkti haba pynïap ïa ki riew paidbah dang shen ha Shahgund Bandipora,” thoh ka J&K Police lyngba u IGP Kashmir Vijay Kumar ha ka twitter.
Haba ïa dei bad kane jingïap u myntri rangbah barim ka Punjab, u Captain Amarinder Singh u la ong ba ki kam lehnoh ki la ïai kiew Kashmir namarba ka Pakistan ka kyrshan ïa ka Taliban haba shimti ïa ka Afghanistan.
“Ka jingsheptieng kaba jur bha jong ngi ka la jia shisha. Ka Taliban ba kyrshan da ka Pakistan ka la shimti ïa ka Afghanistan, ki kam lehnoh ha Kashmir ka la ïai kiew. Ki rit paid ki la shah ther da ka jingjied jong ki bamynta sa ki shipai ki ïap ha ka jingïakhun ha Surankote sector. Ngi donkam ban ïakhun ïa kane ha ka rukom kaba beit,” thoh u shipai ba la rangbah bha ha ka Twitter.

Previous articleShah rai rem uba pynpuh ïa ka tnga da u ‘seiñ Cobra
Next articlePlie u bah AL Hek ïa ka Shillong Ayurvedic Wellness Centre ha Nongmynsong