Kylla ka trok kit Coke ha surok NH-6

Ka trok ba kylla ha surok bah National Highway

Nongpoh, Naitung 19: Ha kawei ka jingjia kylla kali, ki paidbah nongleit nongwan ki la lait thaw na ka jingmynsaw hadien ka jingkylla khongpong jong kawei ka kali kaba la kit ïa u maw eit dewiong (Coke) mynta ka janmiet ha ka por 5 baje eiei ha u surok National Highway-6 ha ka shnong Quinine.

Katkum ka khubor ba la ïohlum, la ong, ba kane ka trok kaba la kit ïa u maw eit dewiong ka dei kaba don ïa u number ML 10 B 7797 bad kaba dang wan na ki bynta jong ka Shallang bad kaba thmu ban leit pynhap sha Guwahati bad katba ka dang don ha lynti, u nongniah u la kum bakla khyrwait ïa u lakam steering bad kane ka kali ka la kylla khongpong noh ha u surok bah NH-6 ha ka por 5 baje janmiet.

Ha kane ka jingjia, la ong, ba u nongniah jong kane ka kali u la mynsaw malu mala hynrei donbok pat ba ym shem la don pat mano mano ba mynsaw, ïa u ne u nongniah la ïalam noh sha Nongpoh Civil Hospital na ka bynta ka jingsumar.

Previous articleAp ka ECI ïa ka khlam ban pynbna ilekshon shiteng samoi
Next articleKyrshan dawa Civil Sub Division ka HYC Mawlai