Klun u bar jylla 2 akar ka jaka ban buh karkhana jri ha Mawsmai

Ki dkhot ka FKJGP, u trai jaka bad ka shnong Mawsmai

Nongpoh, Nailur 13: Ha ka jingjia kaba la pynkyndit hi thar ïa u trai jaka bad wat ïa ka Dorbar Shnong jong ka Mawsmai ha Ri Bhoi District, u wei u bar jylla ba la tip kyrteng kum u Rohit Kapoor ymtang ba u la klun jubor ïa ka jaka hynrei u la pynibor ruh wat ban khang pyrshah ïa ka jingthmu jong u trai katei ka jaka kumjuh ïa ka Dorbar Shnong ban leit ïa kren pynbeit bad ki nongpynïaid jong kawei ka karkhana pynmih jri kaba la tip kyrteng kum ka Resource Rubber Private Limited kaba don ha ka shnong Mawsmai Ri Bhoi District.

            Kane ka jingjia, ha kaba u trai kawei ka karkhana pynmih jri jong ka Resource Rubber Private Limited, u Rohit Kapoor u la pynibor bad khlem treh ban ïa kren pynbeit halor ka jingklun jaka ka jong u bad ka jingbym pynurlong ïa ki jingïasoi soskular bad ka Dorbar Shnong ka la jia biang mynta ka sngi hadien ba u trai jaka u ba la tip kyrteng kum u Bah Cleophas Syiem bad u Rangbah Shnong u Bah Petrus Shakwa ki la leit ban ïa kynduh ïa u trai katei ka karkhana ha ryngkat bad ki nongïalam jong ka Federation of Khasi Jaintia & Garo People, North Khasi Hills District.

            Ha ka jingïakren bad u Bah Cleophas Syiem, u ba dei u CEM barim ka KHADC bad ruh u trai jong katei ka jaka, u la ïathuh, ba u la thied ïa kane ka jaka ha ka shnong 11 Mer, Mawsmai, Ri Bhoi District ha u snem 2017 bad hadien katto katne da ka jingïasngewthuh jingmut lang bad ka Dorbar Shnong Mawsmai, la rai ban ai wai noh kumba 17, 500 square foot eiei ka jaka sha u Rohit Kapoor u ba thmu ban seng ïa kawei ka karkhana pynmih jri ha kaba la ïa soi ruh lyngba ki kot ki sla lane ka soskular kaba khlem da rejister pat bad ki bor ka sorkar jylla lane ki bor pynïaid district kynthup bad ki bor ka District Council.

            U la ïathuh ruh, ba ha kane ka jingïasoi soskular, la rai ban soi tang kumba 30 snem ka jaka bad ruh ban burom ne kohnguh ruh ïa ki kyndon jong ka Dorbar Shnong Mawsmai, ha kaba na ka liang u ne u bar jylla u la kular ban tei ïa u surok ïaid ba paka ha kane ka shnong kumjuh ban pynbit pynbiang ruh ïa ki jingdonkam jong kawei ka skul ha ka shnong Mawsmai, ha kaba la don ruh ka jingrai ban nym shah ïa ka jingïaid jong ki kali heh palat na ki 6 taïar ki trok ban lait na ka jingpynjulor ïa ka surok shnong hynrei u ne u bar u la ïaid lait lut ïa kine baroh bad khlem burom ruh ban pyndep ïa ka soskular.

            U Bah Syiem kum u trai jaka, u la pynpaw pat ïa ka jinglyngngoh kaba khraw ba hadien tang katto katne snem ba wat hadien ba u la dep ban phah ktien sha ki bor ka District Council kumjuh ki bor pynïaid district ka Ri Bhoi District ban nym ailad shwa ïa ka jingai trading lisen ïa u Rohit Kapoor halor kane ka kharkhana ka jong u namar bym pat biang bha ka jingïasoi soskular, hynrei tang hapoh saw snem u ne u bar jylla u la ïoh ïa ka trading lisen bad ruh u la nud ban klun ei haduh palat 2 akar ka jaka palat ban ïa kaba ïa soi soskular ban ai wai, kynnoh u Bah Syiem.

            Na ka liang u Bah Petrus Shakwa, Rangbah Shnong ka Mawsmai, u la pynpaw ïa ka jingsngewsih kaba khraw halor kane ka jingpynibor jong u tei u bar jylla pyrshah ïa u trai jong katei ka jaka bad wat ïa ka Dorbar Shnong hi baroh kawei khamtam halor ka jingbym burom ka jong u ïa ka soskular bad ka shnong ha kaba ïa dei bad ka jingpynïaid ïa ki kali heh ïa kaba la mana ban nym ailad ban ïaid ïa ki kali kiba palat ïa ka 6 shaka shaneng namar kan pynjulor ïa u surok shnong ba la tei kyrpang na ka skim MGNREGS.

            U la ïathuh ruh, ba ymtang katta, u ne u bar jylla ba la tip kyrteng kum u Rohit Kapoor u la ujor ruh da ka ejehar pyrshah ïa ki samla jong ka shnong Mawsmai halor ka jingpyrshah ka jong ki ïa ka jingpynkheiñ ïa ka jingrai ban nym shah ïaid ïa ki kali heh lyngba katei ka karkhana pynmih jri bad kane ka dang sah mynta hapoh ka Khanapara Police Station.

            Halor katei ka jingjia pynibor jong u tei u bar jylla, na ka liang ka Federation of Khasi Jaintia & Garo People, North Khasi Hills District ba la lamkhmat da u Bah Luistar Lyngdoh kum u President bad ka Dorbar ki Rangbah Shnong ka Ri Bhoi District ba la lamkhmat da u Bah Rocky Kylla kum u Chairman, ki la pynpaw lang ïa ka jingsngewkhia halor kane ka jingsakhi ïa ka jingpynibor jong u tei u bar jylla u bym shem la treh ban wan ïa kren ne ban pynshai halor kane ka kam hynrei ban pynibor beit bad khang pyrshah ïa ka jingthmu ban rung jong ki nongïalam sha katei ka karkhana pynmih jri kaba don ha Mawsmai, Ri Bhoi District.

Previous articlePuk tur ki paid Elaka Sutnga ha DC ophis, bym patiaw ban khang karkhana Coke
Next articleYn ïakhih tyngeh ka Sur Ri Bhoi, ba kuman jingdawa ka Sur Nongmawlai