KI JINGJIA HA U SNEM 2020 HA MEGHALAYA

Ka jingjiakynad ha Ichamati, khlad u Bah HS Shylla, shah tep im u menaiksuid…

Shillong, Nohprah 30: U snem 2020 udei u snem uba la buh ha ka jingeh bad jingjynjar ïa baroh ki nongshong shnong jong ka jylla Meghalaya bad ha ka pyrthei baroh kawei na ka jingsaphriang ka khlam COVID-19.

Ha une u snem la sakhi ba kala don ka jingkhih win ha ka jylla na ka jingjia ha Ichamati kaba la ktah ïaka shongsuk shongsaiñ, ka jingwan ka khlam COVID-19 bad ka jylla kala duh ruh ïa u MLA barim bad u CEM barim ka KHADC u Bah Hispreachering Son Shylla.

Ka jingjiakynad ha Ichamati: Watla ka sorkar pdeng kala mynjur ïaka CAB bad kala kylla long aiñ, hynrei ka seng KSU kala leit ban pynlong ïa ki jingïalang ha kylleng ki jaka ban pyrshah jur ïaka CAA bad ban dawa pyntreikam noh mardor ïa ka Inner Line Permit ha ka jylla.

Ha ka 28 tarik u Rymphang katba ka seng KSU ka dang pynlong ïaka jingïalang ha Ichamati ban pyrshah ïaka CAA bad dawa pyntreikam ïaka ILP, ki bar jylla kila thombor ïa ki dkhot jong ka KSU bad ha katei ka jingjia uwei u dkhot ka KSU u samla Lurshai Hynñiewta uba na Sohra, ula khlad ha shen hadien ba ula shah tied bad shah bom haban da jem khnap ha kibar jylla.

Kane ka jingjia, kala pur sha ka nongbah Shillong ha kaba kumba 10 ngut ki bar jylla kila shah dung da ka tari ha ki runar hapoh Ïewduh bad uwei u bar jylla  uba la tip kum u Rupsang Dewan, uba na Barpeta, Assam ula mynsaw jur bad ula khlad noh ha Shillong Civil Hospital.

Ki paidbah kila shongsyier da kane ka jingïakynad bad ki bor sorkar kila shim ïaki lad ki lynti ban pynjur ïaka jingpahara ryngkat ka pynjari ïaka Korphiw ha kylleng ki bynta jong ka nongbah Shillong bad bun ki nongjngohkai kila mih noh na ka jylla ban leitphai sha ka jylla lajong.

Kane ka jingïakynad kala pjah kynsan haba la pynjari ïaka Lockdown ne ka jingkhangdam ban ïada na ka khlam COVID-19.

Ka Khlam COVID-19 bad ka jingpynlut T.399 Klur ka jylla: Ka Meghalaya kala pynjari ïaka Lockdown ha 17 tarik u Lber 17 ban ïada na ka khlam COVID-19 bad ha kane ka jingwan ka khlam u Dr John L Sailo Ryntathiang, 69 snem ka rta u trai jongka Bethany Hospital, u la khlad noh ha ka 14 tarik u Ïaïong bad udei ruh uba nyngkong eh ha ka jylla ban ïap na ka jingpang COVID-19 kane ka jingjia kala pyntieng pynsmiej ïa ki paidbah ka jylla ha kaba la sakhi ba bun kila shongkhop ha la ki ïing.

Nangne shakhmat, la sakhi ruh ba bun ki nongshong shnong ka jylla kiba sah shabar ka jylla kila wanphai noh sha Meghalaya ha kaba la sakhi ba ki shnong ki thaw kila pynbiang ïaki Quarantine Centre bad na ka liang ka sorkar ruh kala pynkhreh ïa ki jaka sah na ka bynta kine kiba wanphai bad kumjuh ïa kito kiba ïoh ïaka COVID-19.

Ha ka jingïakhun ïa kane ka khlam ka Sorkar jylla kala pynlut T.399 Klur tyngka naduh u bnai Lber haduh ka 30 tarik u Nailur. U Symbud Myntri Rangbah ka jylla u Bah Prestone Tynsong ula ong, ba la pynlut T.188.9 Klur ha kaba ïadei bad ka jingpynbiang ïa ki corona center, ka jingthied ïaki PPE, Ambulances, bad kumta ter ter.

Nalor kane, la pynlut T.82.40 klur ban thied ïa ki machine, oxygen cylinders, BP monitors, ventilators, surgical gloves, thermal scanners bad kiwei kiwei. Lyngba ka Chief Minister Special Grant la pynlut pynsep kumba T.14.70 Klur ha ka jingleit shaw ïa ki nongshong shnong ka jylla kiba sahkut ha kylleng ki jylla jong ka ri bad kumta ter ter bad lyngba ka Chief Minister’s Relief Fund, la pynlut T.7.40 klur ha kaban thied ïa ki Ambulance, Bio-Medical Waste Vans bad kiwei kiwei.

Ka jingïapher jingmut ha ka sorkar MDA: Ka BJP kaba dei ka seng kaba donlang hapoh ka sorkar synroplang kala dawa na ka sorkar MDA ba dei ban thung da ka kynhun tohkit halor ki kam bamsap hapoh ki GHADC bad JHADC. Ka NPP kaba ialam iaka sorkar kala pynpaw ba ka BJP kala dei ban rah ia kane ka mat ha ka kynhun MDA ha ka jaka ba kan leit sha ki lad pathai khubor.

Kane ka jingkynthoh ka BJP hapoh ka jingialam u Bah Ernest Mawrie kaba ula pynpa wba ka BJP ka lah ban shim syndon ia u pud ban weng jingkyrshan na ka sorkar MDA, kala pynsat ia ki MLA ka BJP ha kaba kila kynthoh kylla ia u Bah Mawrie ba ym shim la iasyllok bad ki MLA ka seng bad ka jingbyrngem ban weng jingkyrshan na ka MDA kadei ka jingkren shimet jong u Bah Mawrie.

Jop ka MDA iaka No Confidence: Ka sorkar MDA kala pynliem ruh iaka no-confidence motion kaba la wanrah da ka seng Congress hapoh ka Dorbar Synrai jong ka iing dorbar thawain ka jylla bad ha katei ka dorbar, ki dkhot ka seng Congress kila iatai halor kiba bun ki mat bad kynnoh ba ka sorkar MDA ka donkti ha kaban ailad iaka jingtih bad jingkhaii tuh be-ain ia u dewiong, ka jingpynlut phut ka sorkar ha kaba jingiakhun iaka khlam COVID-19 bad ka jingdkoh ka rukom treikam jong ka tnad bording.

Shah jied u Dr. Kharlukhi kum u MP Rajya Sabha: U State President ka NPP u Dr. Wanwei Roy Kharlukhi ha ka 19 tarik u Jylliew u la shah jied kum u MP ka Rajya Sabha da kaba pynrem ia u kyrtong ka Congress u Bah Kennedy Cornelius Khyriem da 20 vote.

U Bah Kharlukhi u la ioh 39 vote katba u Bah Kenndy Khyriem ula ioh 19 vote.

Duh ka jylla ia u Bah HS Shylla: U Nongmihkhmat ba paw bha ka jylla u Bah Hispreachering Son Shylla hadien ka jingban jong ka jingshitom, ula klad noh ha ka 7 tarik u Nailar. U Bah Shylla u la ong teng u Myntri sorkar, u Chief Executive Member (CEM) barim ka Khasi Hills Autonomous District Council (KHADC).

Ula jop iaka elekshon MLA ha u snem 1988-1993 bad 1993-1998 na  Nongkrem Constituency bad u la bat teng ruh ia ka kam kum u Deputy Speaker ka iing dorbar thawain ka jylla, Chairman ka Meghalaya State Law Commission, Co-chairman jongka Meghalaya State Planning Board bad kiwei kiwei ki kyrdan.

Shah tep im u Tymmen ba suba Menaiksuid: Uwei u riewtymmen uba la don 80 snem ka rta ula shah tep im ha West Khasi Hills District ha u bnai Risaw hadien ba ki bahaiing bahasem ki jongu kila suba ba udei u ‘Menaiksuid’.

Halor kane ka jingshah pyniap u Bah Moris Margnar, na Nongdisong, 8 ngut ki bahaiing bahasem ki jongu kila shah kem ha ki pulit.

Sdang pyntriem ka HNLC: Ka kynhun kieng atiiar HNLC kala sdang ban pyntreim biang bad pyni ba ka dang im bad ka dang treikam khamtam haka rilum Khasi bad Jaintia Hills bad kane ka seng kala kam ba kala donkti ha kaban pynbthei bomb ha ka karkhana jong ka Star Cement kaba don ha East Jaintia Hills district ha ka 12 tarik u Nohprah.

Ka HNLC kala kam ruh ba kala donkti ha kaban pynbthei bomb ha ka karkhana Coke kaba don ha Kyllon Mathei Pyndeng, Jalong kaba don hajan Riangdo, West Khasi Hills katba ha kawei pat ka liang ka HNLC ka kwah ban iakren iasuk noh.

Pressure Groups resumes agitation to implement ILP in Meghalaya: Ki sengbhalang bapher jong ka jylla kila sdang bad bteng biang ia ki jingiakhih ban dawa pyntreikam iaka ILP ha ka jylla bad kila pynbna ruh ba naduh u snem 2021 kin pynjur shuh shuh iaka jingiakhih ban dawa pyntreikam iaka ILP.

Kane ka jingiakhih ki sengbhalang kadei kum shi bynta ban pynrem jur iaka sorkar pdeng ka bym shim la niewkor iaka Resolution kaba la mynjur da ka iing dorbar thawain ka jylla ha ka 19 tarik u Nohprah 2019 bad wat haba la dap shi snem ruh ka sorkar pdeng kam shym la ai ia ka jubab kaba shai kdar. 

Previous articleKyrdem bad Ksih u Rangbah shnong ka Ingsaw ïanga: Kong Volenda
Next articleDa ka kong B Wahlang, Senior Science & Head KVK, East Khasi Hills.