Ki atiar ban ïakhun pyrshah ïa u ‘Corona’ ryngkat ka ‘SMS’

George B. Lyngdoh, MLA

La bthei u Bom ba wanrah ïa ka jingpang ha ka mariang. Hadien ba la saphriang ka khlam ‘Corona Virus’ ha kylleng jong ka Jylla, ka lah pynsyier ïa ki paidbah nongshong shnong.

Ka jingpur sted jong ka khlam ka kylleng ka Ri bad ka pyrthei ka dei ka bym pat ju ïohi bad ka buh jingma ïa ka koit ka Khwah jong ngi.

Ki paidbah ki la duh ïa ka jingkynshew, ym ïoh shuh ban ïa kamai, ka ïew lah khang bad da ki hajar ki longïing kiba la mad ïa ki jingtynjuh kiba khraw. Ki nongrep kiba la shah ktah kim nym lah shuh ban khyllie ïa ki jingduh jong ki. Ki samla ki la duh ban leit sha la ki skul ne kolej…ka jingduh kaba shyrkhei bah!!

Haduh ka step jong ka 11 Nailar 2020, la don 2,02,54,685 ngut ha ka pyrthei kiba lah ïoh ïa ka jingpang Covid19. Na kine, 1,31,18,621 (64.76%) ki la koit;7,38,930(3.64%) ki la khlad noh bad 63,97,134 (31.58%) ki don ha ka jingsumar.

Ha Ri India, ki don 22,68,675 ngut ki lah ïoh ïa ka jingpang Covid-19. Na kine 15,83,489 (69.79%) ki la koit, 45,257 (1.99%) ki la khlad bad 6,39,929(28.20%) ki dang don ha ka jingsumar.

Ha ka Jylla jong ngi, haduh ka step jong 11 Nailar 2020, na ki 1,114 kiba la ïoh ïa u Corona Virus 498 ngut ki la koit (44.7%), 6 ngut (0.53%) ki la khlad bad 610 ngut (54.75%) ki don ha ka jingsumar.

Kitei ki jingkheiñ haneng, ki pynpaw ba ki don ki dawai ban pynkoit wat lada ngim pat ïoh ïa ki dawai ban pynïada ïa ngi. Kumta ka jingsyier jong ngi, ka dei ban pynlong ïa ngi ban ïada ïalade na une u khñiang ym pat ban pynher syrngiew.

Ha ka Jylla Meghalaya kumba phi la ïohi, ki briew ki la sumar bha ïalade bad kane ka long ka jingïaid kaba la pynduna ïa ka jingsaphriang sted jong une u khñiang. Hadien 5 bnai ba la ïaid ka jingpakhang shnong, ngi lah ban ïohi ïa ka jingtrei shitom jong baroh – ki bor Sorkar, ki nongïalam saiñpyrthei, ki nongïalam Balang, ki seng bhalang bad ki riew shimet ha i bor jong ki. Hynrei, ngam lah ban nym pynpaw ïa ka jinglong kyrpang jong ka Jylla kaba ngi ïohi ha kane ka por.

Ha ka 16 Naitung 2020 ha CHC Bhoirymbong, nga la ïakynduh ha kaba arsien ïa ki nongsynshar shnong jong ka Ri Bhoi Mihngi. Ka jingïalang ka long kaba shong khia. Ka don ka jingshitrhem bad jingkut jingmut ban ïeng rangbah ban ïada ïa la ki Parari na ki jingktah bashykhei jong ka khlam ‘Corona Virus’. Halade, nga la pyrkhat ba ngi long shisha kiba la ïoh ka jingkyrkhu, ban ïoh ïa ka mynsiem jong ka jingshimkhia jong baroh ki Shnong.

Kum ka nuksa, ha ka jingïalang ba la long ha Nongpoh ha u bnai Ïaïong 2020, nga la kyrpad na ki bor ba dei peit ban pynbiang ki kali pyrta shnong ha ki ophis jong ki BDO ban pynshai ha man la ki shnong ïa ki kyndon jong ka Pakhang Covid (Lockdown). Hynrei, namar bym lah ban pynbiang, ki kali ki la poi tang ha ki katto katne ki shnong ba heh. Sha bun ki shnong la set ryndang lut ki Sangot namar ki jingpynbna ki wan da ki phew tylli shi sngi. Ki tyndong skhor jong nga bad baroh ki para nongmihkhmat ruh ki la shu saw kyrang ban ïarap pynshai ïa ki paidbah lyngba ki mobile.

Ha ki san bnai ba la ïaid, ngi la ïohi kumno ki paidbah bad ki nongïalam ki la tur sha khmat- ban ïarap ïa ki bapang bashitom, ban pynbiang ïa ki marbam, ban ïarap sam ïa ki jingïarap sha ki longïing, ban pynkit ïa ki mar rep bad ban ïaleh ban ïakhun ïa ki jingeh ba mih na ka jingpakhang. Nga sngewnguh ia kane ka mynsiem jingiatreilang kaba wanrah ia ki jingjop ha ki jingeh. Kane ka hap ban neh bad ban ïaid shaphrang.

Ki Shnong bad ki Dorbar Shnong jong ngi ki long ka nuksa ha ka pyrthei ban wanrah ïa ki paidbah ha ka shalyntem jong ka jingsynshar khadar (Participative Governance). Ka jinglong kyrpang jong ki ngim lah ban len ne ban buhrieh – khamtam ïa ki nuksa ba bha kiba ngi iohi haba ngi ïakhun ïa kane ka khlam.

Hooid, ngi dang donkam ban phrang shuh ïa ki rukom treikam jong ki ba kin lah ban kyrda ïa ki jingdawa jong ki kanun bapher bapher. Ki don ki nongpeit pyrman kiba kynthoh ba ki don ki nongialam kiba kiar ban long kiba shai ha ki kam, ban burom markylliang ne ban pynneh tynrai ia ka hok. Lada long kumne, kan pyntlot ia ki jingsynshar bad donkam ban pynbeit. Ka Riti Synshar jong ka Ri (Constitution) ka dei ban long ka phang pdeng jong ka jingsynshar bad ngim dei ban iaid lait na ka.

Dang shen ha ka Dorbar Mang Tyngka (Jymmang 2020), nga la kyrpad ïa ka Sorkar Jylla ban khring na ka song tyngka kaba 20 lak klur jong ka Sorkar Kmie ban ai mynsiem ïa ki Shnong jong ngi lyngba ki skhim pynroi. Kane kan long kum ka jingsiew kylliang ïa ki paidbah na ka bynta ka jingsnohkti lang bad ka jingtrei ryngkat kaba la pynioh ruh ïa ka jingïaroh na ka World Health Organisation (WHO). Nga kyrmen ba ka Sorkar Jylla kan shim khia.

Ka sur kaba mih na ki jingïalang bapher bapher ka long ban kyrpad ïa ki paidbah ban ïasnohkti lang shuh shuh, khamtam eh lyngba ki lai kyndon jingïada SMS – SOCIAL DISTANCE (ïeng pajih kumba 2 meter na ki paralok khamtam haba bun briew), MASK – (tap bha ïa ki khmut ki shyntur haba bun paidbah), SAIT KTI (shuwa ban ktah ïa ka bam ne ki mar ba don ha ki dukan).

Ngin lah beit ban jop ïa kane ka khlam Corona. Ki dawai ban pynkoit ïa kiba shitom ki don. Ngi kyrmen ba ngin ïoh kloi ruh ïa ki dawai ban ïada ïa ngi (Vaccine). Ryngkat ki bor Sorkar bad ki nongïalam baroh, ki atiar jong ban ïakhun pyrshah kin long – ka jingtrei borbah jong ki shnong, ka jingïatreilang jong ki paidbah bad da kaba bud ryngkhi ïa baroh ki kyndon jingïada khamtam – SMS.

(U Nongthoh u dei u MLA na Umroi Constituency bad ïa ka hok longtrai la tyngkai)

Previous articleYn pyllait paidbah ïa ka Music Video “Ha Jingphohsniew” ha YouTube
Next articleHadien ba mih khubor duh khaw reshon • Yn sam khaw hi noh ka ophis SDO Sohra ha Kongthong