Khlad noh i khyllung mar ïa dep pynbaptis ha Romania

I khyllung ba dang pynbaptis.

Bucharest, Rymphang 06: Ka balang Orthodox Church ha Romania ka la mad jingeh bha hadien ba ki la mih bun ki jingkynthoh, na ka daw ba iwei i khyllung i la shah ktah na ka jingsangeh tied u klong snam bad i la ïap, mar ïa dep pynbaptis ïa i.

Haba shah banjur ban pynkylla noh ïa ka jinglehniam, kaba ki ju pynngam lai sien ïa ki khyllung ha ka um khuid kaba ki la pynkyntang, ka la pynkhih win ïa ka Balang, hadien ba ki lad pathai khubor ki la thoh ruh ïa kum kane ka juh ka jingjia ba la jia ha ki snem ba la leit.

I khyllung, iba dang hynriew taïew, la pynkit mardor sha hospital ha Suceava ha ka Lah sngi U Blei hadien ba la sangeh tied u klong snam, hynrei i la ïap noh hadien khyndiat kynta. Ka jingleh post marten kala pynpaw ba i la don um ha u tor jong i.

U nongaiktien jong ka hospital, u Dan Teodorovici, ba la shim na ka jngthoh ha ki lad pathai khubor, la ong: “I khyllung ba shi bnai shiteng la lap ba la sangeh tied u klongsnam ha ka Balang, mar ïa dep pynbaptis. Ka kali kaba kit ïa ine i khyllung ka SMURD unit kaba la poi ha kane ka jaka ka la kham slem khyndiat.

“I la poi ha hospital hapdeng ka jingshitom kaba jur bha bad la pynthiah ïa i ha intensive care unit, bad la pyrshang ban pynneh mynsiem bad ban pynim ïa i.”

U kpa jong ine i khyllung u la ïathuh sha u Monitorul de Suceava: “Ine i khyllung shynrang i la ïam, hynrei une u lyngdoh u la pyngngam ïa i lai sien lai wat hapoh um bad ila ring mynsiem hapoh um. La sei ïa i na um, la ñiad ïa i, na ki doctor nga la lap ba i la kum dih um kumba 110ml … Lada phi ïohi ïa i khyllung ba i ang ka shyntur bad ba i ïam, kim dei ban pynngam ïa i hapoh um, hato phi,phin leh kumta?”

Ki bahaïing  hasem ki la dawa ba dei ban tohkit pyrshah ïa une u lyngdoh,uba la pynbaptis.

Palat ïa ka 56,000 ngut ki briew ki la soi ïa ka online petition ne ka kot ai mukotduma kiba la dawa ba dei ban pynkylla noh ïa kane ka jingleh niam ha ka miet sngi Palei. Ka kot ujor (petition) ka ong: “Ka jingïap jong ine i khyllung ba dang shu kha haba leh kum kine ki jinglehniam ka la ktah jur bha. Kane ka jingma dei ban pynkut noh naka bynta ban ïoh ïa ka baptis kaba kmen.”

U Archdiocese jong ka Suceava u la phah ïa ka jingsngewlem sha ki kmie ki kpa jong i khyllung ha kane ka taïew ba la leit bad u la ong: “Ym don kyntien ne ym don da kiwei pat ki kam ban ñiad ïa ki ummat bad ngi pangnud lang bad ki kmie ki kpa, bad kiba haïing, hynrei ngi don ryngkat bad ki ha kum kane ka por jong ka jingeh.”

U nongaiktien jong ka Romanian Patriarchate, u Vasile Banescu, u la ong ba ka Balang ha ka sngewsih kthang sha kiba haïing halor ka jingkhlad noh jong ine i khyllung, kumta ngi pangnud lang bad kane ka jingjia kaba ngim lah ban sngewthuh shuh”.

Previous articleShah khang khyrdep ka Honda Showroom ba pynsah bai wai dukan T. 3 lak
Next articleKwah ki draibar taksi ban pynbor ïa ki kali shimet ban ïasnohkti ha ka jingïakhih