Kan ym don jingmut ka jingwan u Amit Shah lada um treh ïakren ILP: Bajop

Shillong, Naitung 19:  U secretary jong ka Meghalaya Pradesh Congress Committee (MPCC) uba long u MDC jong ka Rambrai Jyrngam  u Bah Bajop Pyngrope u la ong ba u don ka jingartatien halor ka jingwan jong u myntri ki kam pohiing ka sorkar kmie u Amit Shah ha ka 24 tarik mynta u bnai la u long uba la kloi ne em ban iakren halor ka mat ILP.

“Ka jingwan kam long kaba lah ban shaniah namar haba ki heh sorkar na ka jylla ki leit sha Delhi ban ia kren ia ka ILP bad ka CAA kaba la pyrshah jur ha ka jylla na ka liang   u Amit Shah um shym la kren wat tang shi kyntien ruh”, ong u Bah Bajop.

Lada u Amit Shah u wan sha ka jylla da kiwei pat ki jingthmu bad ym ban iakren ia ka ILP, kan long tang ka jingpynlutksan ia ka pisa jong ka sorkar jylla na ka bynta ki jingpynkhreh bad ban pynbiang ia ki bor pahara.

“Ki paidbah jong ngi, ki khlem iakhih na ka bynta ki kam pynroi kum ki kad liengsuiñ, ki lynti rel, ki surok bad kiwei pat hynrei ki iakhih ban pan ia ka jingpyntreikam ia ka ILP ha ka jylla, te kan myntoi aiu ka jingwan jong u lada um treh ban iakren ia ka mat ba ki paidbah ki thrang bad angnud la slem bah”, ong u Bah Bajop.

U Bah Bajop u la pynrem jur ruh ia ka jingkren u myntri rangbah ka Assam u Himanta Biswa Sarma ban ong ba ki nongshong shnong ka Meghalaya ki kyntur sha u pud u sam ka jylla Assam.

Lada ia ka jylla Meghalaya la phiah na ka bynta ki jaitbynriew Khasi, Jaiñtia bad Garo balei pat kin leit kyntur sha u pud u sam ka Assam haba ki la don la ki jaka puta lajong ha ki khappud? Lada ym don ki Assamese lane ki Rabha ne ki trai jylla jong ka Assam kiba shong ba sah ha ki khappud ka jylla Meghalaya, balei ka Assam ka kwah ban kam ei ia ki jaka puta ba shong ba sah da ki trai ri trai muluk ka jylla”, bynrap u Bah Bajop.

Hynrei, u ong ba ki don katto katne ki kynhun ki riewshimkabu kiba pyndonkam da kiwei pat ki jaitbynriew ki bym dei ki Assamese  ne ki trai jaka ne wat ki bym dei ki nongshong shnong ka India ban kam ia ki jaka jong ka Meghalaya bad ban iohnong ha ki election.

U pynpaw ruh ba um iahap bad ka jingai jingmut u myntri rangbah ka Assam ha kaba iadei bad ka shim ka ai (Give and Take policy) ban weng noh ia ki jingiakajia pud bad ki jylla ba marjan.

Kam long kaba lah ban wad biang ia ki dulir jong ki jaka naduh ba la seng ia ka jylla naduh u snem 1972 namar kane ka la slem bha. Ha ka bynta kane ka jaka dei ban wad bniah ba kino ki shnong kiba don ha ki khappud jong ka Meghalaya bad Assam ki hap ha kino ki lai tylli ki district council jong ka jylla bad ban pyntikna ba ka Assam kan nym kam ne tuklar.

Baroh arliang kata ka Assam bad Meghalaya kin iohnong da kaba pynkut noh ia ka jingiakynad khappud kaba la neh mynta la 49 snem. Ha kaba u la pdiang sngewbha ruh ia ka jingthrang ka sorkar jylla ban pynkut noh ia kane ka jingiakynad.

“Ngi kyrshan bad ngi ai khublei ia ka sorkar MDA lada ka lah ban weng noh ia ka jingiakynad pud kaba la neh slem bha namar kam dei ban don ka jingkynnoh ia kino kino ki party na ka bynta ka bha ka miat jong ki paidbah khamtam ha ki thaiñ khappud, ym tang ha ka jylla hynrei ha ka thaiñ shatei lammihngi baroh kawei”, u bynrap shuh shuh.

Previous articleDawa u James & NPP ban ai Distrik noh ïa ka Dadenggre
Next articleBteng sam marbam ka Child-Line sha ki longïing ba don khyllung ha Ri Bhoi