Ka PWD, ki Surok bad ka jingud ki Paidbah

Da u Bah Philip Marweiñ

Kam dei ka sien kaba nyngkong ba la dep thoh bad la pynpaw ha ki Kotkhubor bad ha ki private channel ïa ka jingsniew palat jong ki Surok ha ki nongkyndong bad wat ha ki jaka khap sor ruh.

Ki surok kiba kham paw kyrteng bha ha ka jingsniew ki dei kine: Ka surok Rymbai-Bataw-Borkhat-Jelalpur; ka surok Khlieh Mustem-Umpowin-Mawlasnai-Tyrso-Umtngam-Birseij-Mawthut-Sohphoh; ka Umsning-Raitong-14 kilo-Mawhati-Umsohlait-Sonidan-Korhadem-Mawlaho-Umlaper-Umtrai-Umsiang-Maiong;, ka Surok Umling-Lailad-Nongladew-Patharkhmah,; ka Surok Nongshillong- Umkrem-Pariong-Rngisawlia-Lad Sngimawlein-Jashiar;, ka Surok Mawkyrwat-Mawlangwir-Mawranglang-wahrilang-phodtdei-Pawphlang-Mawiong-Laitjynrai,; ka Surok na Pariong-Mawkyllei-Lawbyrtun-Tiehnongbah-Lyngkhoi-Mawkneng-Sohiong.

Ka Surok Nongstoiñ- Mawriewsyiar-Steplanglur- Khliehmawlieh-Mawphansyiar- Rambrai- Mawdoh;, ka Surok Nongstoiñ- Nongjyllieh-Lawse-Mawduh-Sangriang; ka Surok na Nongstoiñ-Nongpyndeng-Risiang-Umthli-Mawlait-Nongtraw-Wahlyngdoh-Nongsba-Miangshang-Nongpathar-Maweit; nangta Nongstoiñ-Nongjyllieh-Kynroh-Nonglwai- Sasniang-Pombriew-Laitjynrai -Rangblang Sohsyniang-Rangblang Nongbah-Sohphe Khylliang–Lad Ngundilang-Mariem-Umdohlun-Mawpat-Wahkaji-Tynrong Mawpat – Phlangdiloin haduh Langkpa. Ki don ruh sa kiwei kiwei ki surok ki ba bun kiba la sator bha bad kiba donkam ban kdew hangne hynrei ki la bun than bad ym ïoh jaka ban kdew lut hangne bad tang kiba don ha Khasi bad Jaiñtia. Lada kdew sa ïa ki surok kiba la tor ha Garo Hulls ngin ia ong bad batai shuh sa kumno?

Lada ka PWD ka ai jingtrei kontrak ha ki kontraktor shimet shimet ka jingtrei jong ki ka suki palat ban pyndep bad ki trei torti palat,  ki jingtrei kim neh tang shi samoi ruh. Ki EE, ki SDO bad ki Junior Engineer ki tip kham bha balei ka leit long kumne, katba ki jingmang antad (estimate) bad ki jingthew ki la biang lut. Hynrei balei hadien shiteng snem ki la jot lut ? Kane baroh khoit ka dei namar ka jingbym kitkhlieh bad jingsynjor bad Ai Mon ki ophisar jong ki Division bad ki Sub-Division PWD. Nangta ka jingaili ruh ïa ki Muster Roll. Ym ju kham ïohi ïa ki ba ki don ha site bad wat ïa ki SDO ruh ym ju ïohi ba ki pyrkhing ïa ki MR bad ïalade ruh. Haba kumne dei keiñ ban ïoh ïa ki surok kiba sniew.

Shano ki EE ki don? Kim leit jurip ïa ki surok hapoh ka jingpeit lajong?. Lada ka ïai long kumne Hadien 49 snem jong ka jingïoh jylla, kan myntoi aïu ban ïoh jylla lajong. Ka bha ban aiti noh ïa ki jingpyntrei ïa ki surok ha ki Kompeni ban ïoh ïa ka kam ka ba bha bad kham neh. Phi lah ban ong ba lada leh noh kumne,kin duh kam ki briew lajong. Baroh shikatta la Ai lad ïa ki briew lajong ban ïoh kam bad ban ïoh kamai bad ki la kiew ha ka spah hynrei shano kita ki surok kiba bha? Naduh ba la wan trei surok ki Kompeni ngi la ïohi shisha ïa ki surok kiba bha bad kiba kham neh.

Ka sorkar hapoh ka PWD ka la dei ban khmih sani noh, ban plan bad ban phai noh sha kiwei kiwei ki built pynïaid kam ban ïoh kheit noh ïa ki soh kiba paka khlem da wad than ïa ka jingïoh khwan myntoi shimet.

Previous articleKwah ki draibar taksi ban pynbor ïa ki kali shimet ban ïasnohkti ha ka jingïakhih
Next articleDawa ban pyntreikam pura ïa ka MRSSA