Ka Nehru Memorial Skul ka slem ai jingstad ia ki samla pule:Dr. DD Lapang

U Dr. D.D Lapang katba u dang plie ïa ka building skul thymmai ka Nehru Memorial HSS

Nongpoh, Lber 31: Ka long shisha ka jingkmen kaba khraw bad ka ban sah jingkynmaw na ka bynta ki samla pule bad ki nongkitkam ka Nehru Memorial Higher Secondary School, ha kaba ka jingangnud bad ka jingphohsniew ban ïoh noh ïa ka skul building bad ki lad jingpule kiba katkum ka juk kaba myntan ka la urlong hadien ka jingleit ban plie ïa ka ingskul kaba thymmai da u Dr. D.D Lapang, Nongaibuit ba rangbah ka sorkar jylla.

Ïa ka ïing building kaba thymmai jong skul Nehru Memorial Higher Secondary School la tei ha ka jinglut kaba la mang haduh 2.69 klur ïa kaba la mang lyngba ka Supporting Human Capital Development na ka Asian Development Bank.

La sakhilang ruh ha kane ka sngi, ba la plie ïa ka building kaba thymmai jong ka Nehru Memorial HSS, da u Bah Jason Sawkmie Mawlong, MLA ka Umsning constituency, ka Kong Magdalene S Mawlong, MDC, ka kong RM Kurbah Deputy Commissioner, u Bah L. Lapang, Principal ka Nehru Memorial HSS nalor kiwei kiwei ki ophisar bad ki nongïalam shnong.

Haba kren ha kane ka sngi kum u kongsan, u Dr. D.D Lapang, u la ai ka jingïaroh kaba khraw sha ki bor pynïaid jong ka Nehru Memorïal Higher Secondary School, kiba naduh ba la sdang ïa kane ka shlem ai jingstad ki la trei shitom ban pynphriang ïa ka jingnang jingstad sha ki samla pule haduh kine ki snem.

“Kum ki khynnah pule ki dei ban don ïa kata ka thong lane ka jingangnud ban long eiei ha la ka jingim bad ïa kane yn lah ban pynurlong ka dei tang da ka jingtreishitom ban minot thop ha la ka jingpule bad shisien ka sngi kin sa lah pat ban kot sha kata ka thong ba ki don”, ong u Dr. Lapang.

U Dr. Lapang u la pynpaw ruh, watla ka jingïaid lynti kum kawei na ki shlem ai jingnang jingstad jong kane ka skul kam shem la long kaba suk, hynrei dei namar ka jingïaineh ha la ka nongrim bad ka jingtreishitom jong ki nongseng lem bad ki nonghikai, kane ka skul ka la paw bha mynta bad ka long ka jingmyntoi kaba khraw ïa ki samla pule, u la kitbok kitrwiang ruh ïa ki nonghikai bad ki samla pule ba kin nang lah ban jam shaphrang ha ka jingim ka jong ki.

Previous article“Donkam ban jied ki nongialam ban kyntiew i’a imlang bad ki longkmie”
Next articlePyllait im u hymmen ïa u para na ka jingngam jyllop ha Mawlong