Ka Land Act KHADC, ban pynkup bor ïa ki khlieh Nongsynshar

Shillong Naitung 20:Ki MDC liang Pyrshah ka Khasi Hills Autonomous District Council (KHADC) hynne ka sngi ki la iakynduh ia u Deputy CEM ka Council u Bah Gigur Myrthong ban dawa ba ka Executive Committee (EC) ka dei ban iasyllok shwa ia baroh ki MDC shwa ban mynjur ia ka Land Bill jong ka Council.

U MDC jong ka Mawkhar Pynthorumkhrah u Bah PN Syiem u la ong, ki MDC ki la iatai sani ha ka iing dorbar ban bishar bniah ia katei ka Bill shwa ban phah da ka Select Committee bad ban rah biang ia kane ka Bill sha ka dorbar ban ioh ia ka jingmynjur na ki dkhot ka iing.

“Ha kine ki sngi la don ka jingpynpaw ba dei ban ai jingmynjur noh ia ka Land Bill jong ka Council, namar ba kane ka mat ka dei kaba ktah ia ki trai jaka, kumta ki MDC hapoh ka kynhun jong ka United Democratic Forum (UDF) ka kwah ba u CEM ka KHADC ryngkat bad ka Select Committee kin shim shwa ia ki jingai jingmut ki khlieh nongsynshar, ki Rangbah shnong bad ki sengbhalang bad ban buh ia katei ka Bill ha ka Website khnang ba ki riew shemphang ha Ri Khasi baroh kawei, kin ioh ban ai jingmut na bynta ban kham pynbha bad pynjanai ia katei ka Bill” ong u Bah PN Syiem.

“Ka jingthmu jong katei ka Bill ka long ban lait noh ka leit sha u Sub Registrar, ban ithuh noh da ka aiñ khyndew jong ka District Council ia kaei ba leh da ki Raid, Hima, shnong bad ka Kur ha kaba ia dei bad ka jingia die ia thied jaka” u la bynrap.

“Ka EC ka shu leh kyrkieh halor ka Land Bill, ha ka jingshisha ka la dei ban buh shwa ia katei ka Draft Bill ha ki Website, khnang ba kiba bun balang kin ioh ai jingmut bad kam dei ban shu rah sha ka iing dorbar khlem ka jingai jingmut. Haba ki rah ha ka Iing dorbar, ngi na ka liang ka UDF ngi la pynbor ia ka EC bad ka dei ban phah shwa ia katei ka Bill sha ka Select Committee bad ka EC ka la mynjur ia kane ka jingtyrwa jong ki MDC ka UDF” ong u Bah PN Syiem.

U la ong katei ka Bill ka don bun ki jingduna bad donkam ban lait noh na u Register jong ka Indian Registration Act, namar hadien u snem 1982 ngi hap ha u Sub Registrar hynrei shwa u snem 1982 ngi hap ha ki shnong, Raid, Hima bad Council bad ym lah ban tip ha kano ka nongrim la pynhap ia ngi ha u Sub Register jong ka IRA bad baroh ki hap ban leit register mynta ha ka IRA.

Kumta donkam ban iatai sani bha ban lait na ka IRA na bynta ka bit ka biang jong ki trai ri trai muluk bad ka Land Act ka dei ban pynkup bor ia ki khlieh nongsynshar ban soi bad pynthikna ia ki kot ki sla jaka puta.

Previous articlePhah tuklar ka HYC ïa ka aiñ khang Khaïi masi ka Assam
Next articlePyndep ki riew tymmen ïa u tika baar ha Nongpoh, pynshlur de ïa kiwei