Ka jingpynbeit pud Meghalaya-Assam, kan long katkum u pud ki Hima Khasi:UDF

Ki MDC ka Liangpyrshah kiba shong jingialang

Shillong Naitung 20:Ki MDC Liang Pyrshah ka Khasi Hills Autonomous District Council (KHADC) ki dawa ka Council ka dei ban ieng skhem ha ka nongrim ba ka jingpynbeit ia u pud u sam ka jylla Meghalaya bad Assam ka dei ban long katkum u pud u sam jong ki Hima Khasi kumba la kdew ha ka 6th Schedule jong ka riti synshar ka ri.

U MDC ka Mawkhar Pynthorumkhrah u Bah PN Syiem u la ong, ki MDC hapoh ka kynhun United Democratic Forum (UDF) ki pynpaw ka jingsngewnguh ia u CEM ka KHADC u Bah TW Chyne halor ka jingthaw ia ka Boundary Committee na ka bynta ban ioh ai jingmut ia ka sorkar jylla ha kaba iadei bad u pud u sam.

“Ka UDF ka ieng skhem ha ka nongrim ba dei ban pynbeit ia u pud u sam hapdeng ka jylla Assam bad Meghalaya da kaba pynshong nongrim katkum u pud u sam jong ki Hima Khasi kumba la kdew ha ka Sixth Schedule jong ka riti synshar ka ri” ong u Bah PN Syiem bad ka ong,

“Lada ki Hima Khasi ha ka por synshar ki phareng ki don ia ka bor synshar halor ka khyndew ka shyiap bad ki phareng ki hap ban nguh Syiem haba ki donkam tang khyndiat ruh ia ka khyndew, kan eh aiu ban leh mynta ruh, namar ki Hima Khasi ki don ia ka bor bad ka District Council ka don ia ka bor halor ki jaka ki puta bad u pud u sam jong ki Hima Khasi u dei ruh u pud u sam jong ka District Council, kumta dei ban ieng skhem beit ha ki dulir jong ki Hima Khasi la ka dei naduh Kamrup ne na kiwei ki jaka, kumba la pynkup bor ha ka Para 20 jong ka Sixth Schedule”.

Ka UDF ka pynpaw ia ka jingkmen ba u CEM ka KHADC ula pynmih ia ka jingpynbna ba dei ban pyllait noh ia ki Bill ne pisa jong ki Kontraktor hapoh shi bnai hadien ba ki la pyndep ban trei ia ka kam jong ka Council khnang ba kan ym buh jingeh ia ki kontraktor ban bteng ia ki kam.

Previous articleShah kynnoh donkti u tnga ka Shilpa Shetty ba pynmih phlim dakait, kem ki pulit
Next articlePhah tuklar ka HYC ïa ka aiñ khang Khaïi masi ka Assam