“Ka jingkiew ki briew kiba ïoh ïa ka jingpang COVID-19 ka la lah ban jia ha kano kano ka por,”: Hek

Shillong, Jylliew 14: U Myntri ka tnat ka Koit ka Khiah, u Bah Alexander Laloo Hek u la ong ba ka Sorkar ka khmihlynti ba kan don ka jingkiew ha ka liang ka jingïoh ki briew ïa ka khlam jingpang COVID-19.

       “Ka jingkiew ki briew kiba ïoh ïa ka jingpang COVID-19 ka la lah ban jia ha kano kano ka por,” la ong u Bah Hek hynne ka sngi.

       Haba kylli katno ngut ka sorkar ka khmihlynti ba kan don ka jingkiew, u la ong ba ka long kaba eh ban batai namar ka long kaba eh ban antad.

       Na ka liang u Myntri ka tnat ka Koit ka Khiah u la ong ba ka sorkar jylla ka long kaba la pynkhreh lada ka don ka jingkiew ha ka liang ka jingïoh ki briew ïa ka COVID-19.

       Katkum ka kaiphot jong ka State Surveillance Team (SST), ka jingïoh ki briew kiba long positive ïa u COVID-19 ka lah ban kham kiew ha nongbah Shillong ha kine ki khyndiat sngi ban wan.

       Ka tyllong khubor ka ïathuh ba ka SST ha ka jingwad bniah jong ka, ka la lap ba ka lah ban don ka jingkiew ha ka liang ki briew kiba ïoh ïa ka khlam jingpang.

       Lah ban kdew, ka SST ka la pynshong nongrim ïa katei ka jingwad bniah halor ka jingwanphai ki briew kiba sahkut shabar jylla. Na ka liang katei ka kynhun ka la lum jingkheiñ ba ki don katto katne ki shnong ki ban shah ktah jur namar ka jingbun ki briew kiba wanphai khamtam na ki jaka kiba dei ki red zone.

       Shuh shuh, ka tnat ka Koit ka Khiah mynta ka sngi kan sdang ïa ka jingshim ïa ki nongmuna na ki nongshong shnong ki saw tylli ki shnong kiba don ha syndah ki BSF camp.

       Ka sorkar jylla ha kane ka taïew ba la dep ka la rai ban shim ïa ki nongmuna na ki nongshong shnong hadien ba ka don ka jingkiew ha ka liang ki briew kiba pang COVID-19.

       “Ngi sdang ban lum ïa ki nongmuna ha ka shnong Nongmensong, Umpling, Mawpat bad Langkyrding Mihngi naduh ka sngi Balang,” la ïathuh u Bah Hek.

       Haba batai bniah halor ka jingshim ïa ki nongmuna na ki nongshong shnong, u Myntri ka tnat ka Koit ka Khiah u la ïathuh ba kin shim ïa ki nongmuna na uwei u briew na ki 5 tylli ki ïing kiba don syndah bad ka camp jong ka BSF. Ha kajuh ka por, u la ïathuh ba kin shim ruh ïa ka nongmuna na uwei u briew na ki 10 tylli ki ïing kiba don kham jngai na ka jaka ba don ki BSF.

Previous articleRahbor ki runar ïa u rangbah, kem noh ki pulit ïa 4 ngut ba suba donkti
Next articleKmen kiba ñiah & ba bud kali ba ïohphong da ki PPE